Шомуродовга кутилмаган харидор чиқди, лекин...

Элдор Шомуродовнинг жорий мавсумда ҳам “Рома”даги ишлари юришмаяпти. Қадрдон устози Клаудио Раньери ҳужумчимизга имкон бермай қўйди.

Рим клуби ҳужум чизиғида ўйинчи етишмаслигига қарамай, мана кетма-кет иккинчи учрашувда ҳам 29 ёшли форвард захирада қолдирилди. Раньери бошқа ўйинчиларга имкон беришни маъқул кўрмоқда.

“Рома” мутасаддилари бошқа марказий ҳужумчи олишни мақсад қилган. Бу трансфер катта эҳтимол билан январда амалга оширилади. Ўз ўрнида, клуб Элдор Шомуродовни бошқа жамоага ўтказиб юборишга ҳаракат қилмоқда.

Даниэле Де Росси бош мураббийлик қилган даврда амалдаги келишуви 2026 йилнинг 30 июнида тугайдиган Элдор Шомуродовга янги шартнома таклиф қилиниши борасидаги ташаббуслар клуб раҳбарияти томонидан қўллаб-қувватланмади ва бу мавзу ўз-ўзидан ёпилиб кетди.

Легионеримиз “Рома”га ўтганидан бери ҳар трансфер ойнаси даврида унга турли жамоалардан чорлов бўлади. Бу гал ҳам январда Элдорга оғиз соладиган клублар топилишига шубҳа йўқ. Зотан, ҳозирнинг ўзида дастлабки даъвогар пайдо бўлди.

Ўтган мавсум якунларига кўра Италия чемпионатининг юқори дивизионини тарк этган “Салернитана” бу йил B серияда кураш олиб бормоқда. Салерноликларнинг қуйи дивизионда ҳам ишлари юришаётгани йўқ.

Жамоа 16-турдан кейин 17 очко билан мусобақа жадвалининг 16-поғонасига тушиб қолган ва бу хавфли ҳудуд ҳисобланади. “Салернита”нинг ҳозирги ҳолатида жамоа учун А Серияга қайтиш эмас, янада қуйилаб кетмаслик учун В Сериядаги жойини сақлаб қолиш муҳим аҳамият касб этади.

Италия футболини ёритиб келаётган манбалардан бири – tuttocagliari.net нашрининг ёзишича, “Салернитана” раҳбарияти таркибни кучайтириш мақсадида тақдири “Кальяри” билан кесишган уч нафар тажрибали ҳужумчидан бирини ўз сафига қўшиб олмоқчи.

Манбага кўра, салерноликлар ўтган мавсум ижара асосида “Кальяри”да ўйнаб, жамоанинг юқори дивизионда қолишига ҳисса қўшган Элдор Шомуродовни январда ўз сафига қўшиб олишга ҳаракат қилмоқда.

Бундан ташқари, TuttoSalernitana нашри “Салернитана” ўтган мавсум Элдор билан бирга ўйнаган Жанлука Лападула ва Леонардо Паволеттини ҳам нишонга олган. Бу икки форварднинг “Кальяри”да ишлари кутилганидек кетмаяпти. Бу мавсум улар тўққизтадан учрашувда иштирок этган бўлса-да, ҳали голлар ҳисобини очгани йўқ ва ички рақобатда Зиту Лувумбу ҳамда Роберто Пикколига имкониятни бой беряпти.

Шу ўринда таъкидлаш лозимки, Элдор Шомуродов “Рома”да захирада қолиб кетаётган бўлса-да, катта эҳтимол билан B Серияда қолиш учун курашаётган жамоага ўтмайди. Авваллари кузатилганидек, Шомуродовга А Сериянинг ўзидан харидор чиқиши ҳақиқатга яқин. Зеро, яқинда юқори дивизион дебютанти “Комо” ўзбек футболчисини олишга қизиқиш билдирган эди.

Демак, қишки трансферлар вақтида Элдор Шомуродов фаолиятида ўзгариш бўлиши мумкин. Легионеримиз атрофидаги вазиятни кузатишда давом этамиз.

Файзуллаев ҳақида яна бир яхши хабар!

Ҳусанов “Тоттенхэм”га ўтиб кетмасин! Суперклуб Абдуқодирга таклиф берадиган бўлди
Ким тезкор: Шомуродов ёки Дибала? (фото)