Шомуродовнинг собиқ жамоадоши энди "Рома"да ҳам унга рақобат қилиши мумкин

Бир неча кун аввал Италия чемпионатининг ўтиш ўйинида "Специя" ва "Верона" ўзаро тўқнаш келди. Беллашувда "Верона" 3:1 ҳисобида ғалаба қозониб, А Серияда қоладиган бўлди.

Мавсумнинг ярмини "Специя"да ижара асосида ўтказган Элдор Шомуродов яна "Рома"га қайтади. Бу ҳақда футболчининг ўзи Ўзбекистон миллий терма жамоаси йиғинига келганда маълум қилди. 

Қолаверса, "Рома" Жанлука Скамаккага қизиқиш билдирмоқда. "Вест Хэм" ҳужумчиси яна Италияга қайтиши мумкин. Бу ҳақда маҳаллий журналист Жанлука Ди Марцио хабар берди. 

Манбанинг маълум қилишича, "бўрилар" 24 ёшли форвардни қўлга киритмоқчи. Клуб вакиллари шу ҳафта футболчининг агенти билан учрашмоқчи.

Эслатиб ўтамиз, Элдор Шомуродов "Рома"га ўтишдан аввал "Женоа"да Жанлука Скамакка билан бирга тўп тепганди. Энди улар Рим клубида ҳам жамоадошга айланиши мумкин.