Шу футболчи гол урса, жамоаси умуман ютқазмайди

“Арсенал” ҳужумчиси Габриэл Жезуснинг ўйини очилиб кетди. Бразилиялик футболчи ажойиб статистикани давом эттирмоқда.

Микель Артета шогирдлари Англия Премьер-лигасининг 17-турида “Кристал Пэлас” майдонидан 5:1 ҳисобидаги ғалаба билан қайтди.

Жезус бу баҳсда дубль қайд этди. Squawka статистика марказининг маълум қилишича, Габриэль Жезус Англия Премьер-лигасида гол урган учрашувларнинг бирортасида унинг жамоаси мағлубиятга учрамаган.

Бу серия айни пайтда 61 та учрашувга етди. Бу беллашувларнинг 56 таси Жезуснинг жамоаси ғалаба қозонган, бештасида дуранг қайд этган.

27 ёшли ҳужумчи 2017 йилдан бери Англияда тўп тепмоқда. Дастлаб у беш йил “Манчестер Сити” шарафини ҳимоя қилган ва 2022 йилнинг ёзида “Арсенал”га кўчиб ўтган.