“Сити” ҳимоячиси “Челси” базаси ёнида уй қуряпти

“Манчестер Сити”нинг нидерландиялик ҳимоячиси Натан Аке ўзининг собиқ жамоаси “Челси”га қайтиши мумкинлиги кенг муҳокама қилинмоқда.

The Sun нашри маълумотига кўра, 31 ёшли футболчи “аристократлар” машғулот базасига яқин жойда жойлашган ҳашаматли уйини қайта қуряпти.

Бу ҳолат нидерландиялик футболчининг “Стэмфорд Бридж”га қайтиши ҳақидаги миш-мишларни кучайтириб юборди.

Ҳимоячи ўтган йилнинг ноябрь ойида 4 миллион фунт стерлинг қийматида хусусий мулк сотиб олган эди. Ҳозир у шу уйни бузиб, унинг ўрнига 7 та ётоқхона, меҳмонхона ва алоҳида совринлар хонасига эга бўлган янги ҳашаматли сарой қуриш режаси устида иш бошлади.

Эслатиб ўтамиз, Натан Аке 2011 йилдан 2017 йилгача “Челси”да ўйнаган. Кейинги уч йилни “Борнмут” ўтказганидан кейин “Манчестер Сити” уни 45,3 миллион евро эвазига ўз сафига қўшиб олган.

Натан Аке кейинги пайтда асосий таркибга кириши қийинлашиб қолгани учун жамоадан кетишга тайёргарлик кўрмоқда. Унинг амалдаги шартномаси 2027 йилнинг 30 июнигача тузилган.