Собиқ футболчи "Манчестер Сити"га Канте трансферини маслаҳат берди

Ўтмишда машҳур бўлган футболчи Дин Сондерс "Манчестер Сити" клубига тажрибали ярим ҳимоячи Н’Голо Кантени жамоага жалб этишни маслаҳат берди.

"Бу мавсумдаги энг яхши трансфер бўлиши мумкин. У таянч зонада ҳимоячи каби фикрлайди ва бутун майдонни ёпиб бера олади. У 34 ёшми? У ҳали ҳам юқори даражада ўйнай олади", — дея Сондерс сўзларини келтиради "talkSPORT".

Мутахассиснинг фикрича, франциялик ярим ҳимоячига бир йиллик шартнома таклиф қилиш етарли бўлади. Канте аввалроқ Англия чемпионатида "Лестер" ва "Челси" жамоалари сафида тўп сурган. Айни пайтда у Саудия Арабистонининг "Ал Иттиҳод" клуби шарафини ҳимоя қилмоқда.

Жорий мавсумда Н’Голо Канте 17 та учрашувда майдонга тушиб, бир марта рақиблар дарвозасини ишғол қилди.