Собирхўжаев: Фламарион қизил карточка олгунга қадар уларда қандайдур вазият бўлганини эслай олмайман

Суперлиганинг 21-турида "Нефтчи" устидан қозонилган ғалабадан кейин "Пахтакор" ярим ҳимоячиси Сардор Собирхўжаев журналистлар саволларига жавоб берди. 

Қизил карточкадан кейин ўйин қийин ўтди. Очко бугун зарур эди ва биз буни қўлга киритдик. 

Ғалабада қайси жиҳат муҳим омил бўлди?

"Нефтчи" қўрқиб келди, деб ўйлайман. Сабаби, Фламарион қизил карточка олгунга қадар уларда қандайдур вазият бўлганини эслай олмайман. Агар 11 киши бўлганимизда, ўйин осонроқ кечган бўларди. 

Биринчи даврадан кейин уларнинг таркибида ўзгаришлар бор эди. Бу қанчалик сезилди?

Таркибда унақа катта ўзгаришлар йўқ эди. Алишер Одилов ва Жоэль Кожо келди, қолган барчаси ўша футболчилар, ўша-ўша футбол. 

Сизни охирги марта "Динамо"га қарши учрашувда кўрган эдик. 

Ўша баҳсдан кейин жароҳат олгандим. Даволандим, секин-секин тикланмоқдаман. 

Ҳакамлик борасида нима дея оласиз?

Бу ҳақида гапирмай қўя қолай. Қўйинглар, менга ҳам жарима солишмасин (кулади). Тўғри қарорлар бўлди, деб ўйлайман. 

Кейинги ўйин "Шўртан"га қарши. Бу баҳс енгилроқ ўтадими?

Йўқ, улар билан учрашув қийин ўтади. Биринчи даврада ҳам "Нефтчи"ни ютганимиздан кейин қийналган эдик. Сабаби, эмоцияларни бериб бўлгандик, лекин 6 кун вақт бор, тикланишга улгурамиз. 

3 очкони қўлга киритган "Пахтакор" 3-ўринга кўтарилиб олди. Иккинчи поғонадаги "Нефтчи" билан орадаги фарқ 3 очкони ташкил қилади.