Son Ronalduning jamoadoshiga aylanishi mumkin

Son Xyon Minning "Tottenxem"dagi kelajagi so‘roq ostida qolmoqda.

talkSPORT nashrining xabariga ko‘ra, londonliklar sardori bu yozda klubini o‘zgartirishi mumkin. 32 yoshli hujumchiga Saudiya Pro-ligasining uch jamoasi birdek qiziqish bildirmoqda. Janubiy koreyalik futbolchi uchun asosiy da’vogar sifatida "Al-Ahli" ko‘rilmoqda, biroq unga "Al-Qadisiyya" va "An-Nasr" jiddiy raqobat qilmoqda.

Manbaga ko‘ra, ushbu uch klub tajribali hujumchini qo‘lga kiritish uchun 40 million evro taklif qilishga tayyor. "Tottenxem" rahbariyati esa futbolchini hozirdanoq sotishni ko‘rib chiqmoqda. Uning amaldagi shartnomasi 2026 yil yozigacha amal qiladi. Klub vakillari 30 yoshdan oshgan futbolchi uchun bunday summada taklif olish qiyin deb hisoblamoqda.

O‘tgan mavsumda Son barcha turnirlarda 46 ta o‘yinda maydonga tushib, 11 ta gol va 12 ta golli uzatmaga mualliflik qildi.