SPORTS.uz'да жаҳон чемпионати кундалиги (13-сон)

Қатарда жаҳон чемпионати давом этмоқда. SPORTS.uz сайти ижодкорлари ушбу мундиал кундалигини тақдим этади.

Нидерландия АҚШга имконият қолдирмади. Эътиборли жиҳати шундаки, Коди Гакпонинг бир ўзи турнирда АҚШ термаси билан тенг гол уришга эришди.

Аргентина Австралияни мағлуб этиб, чорак финалга йўл олди. Месси жаҳон чемпионатларида илк бор плей-оффда гол урди.

Нидерландия - АҚШ 3:1

Нимчорак финалнинг илк ўйинида Нидерландия ва АҚШ терма жамоалари кейинги босқич йўлланмасига эга чиқиш учун ўзаро кураш олиб борди. Ушбу тўқнашувда "кўҳна қитъа" вакиллари 3:1 ҳисобида зафар қучди. 

Депай 10-дақиқада жамоадошининг ажойиб узатмасини голга айлантирди. Биринчи бўлимга қўшиб берилган дақиқанинг дастлабкисида эса Блинд ҳисобдаги фарқни яна биттага оширди. У яна ўша Дюмфрис узатган тўпни дарвозага жойлаб қўйди. Тайм шу ҳисобда якунига етди.

Иккинчи бўлимда, аниқроғи, 76-дақиқада Райт товони билан супер голга муаллифлик қилди. Унинг зарбаси нидерландияликлар посбонининг устидан ошиб, дарвоза тўрига бориб тушди. Аммо "лолалар юрти" вакиллари бу голдан ўзини йўқотиб қўймади. 81-дақиқада ўз номига 2 ассист ёздириб қўйган Дюмфрис бу сафар ўзи қулай нуқтага чиқиб борди ва гол урди - 3:1. Ушбу гол баҳсга якуний нуқтани қўйди.

Луи ван Галдан фақатгина Луис Фелипе Сколари жаҳон чемпионатидаги мағлубиятсиз серия бобида яхшироқ натижа қайд этган. Кейинги учрашувда ҳам Нидерландия мағлубиятга учрамаса, ван Гал бу борада Сколарига етиб олади. 

Депай терма жамоа сафида ўзининг 43-голини киритди. Бу орқали у Нидерландия тарихидаги энг яхши 2-тўпурарга айланди. 1-поғонадан 50 тўп киритган Робин ван Перси ўрин эгаллаган.

Пулишич ушбу жаҳон чемпионатидаги АҚШнинг барча урилган 3 голида иштирок этди. У жорий мусобақада 1 бор дарвозани ишғол этиб, 2 самарали узатма муаллифига айланган.

Коди Гакпонинг бир ўзи турнирда АҚШ термаси билан тенг гол уришга эришган.

Дюмфрис мазкур мундиалда 3 голда иштирок этган (1 гол, 2 ассист) илк футболчи бўлди. Америкаликлар плей-офф босқичига чиққан энг ёш терма жамоа бўлди.

Аргентина - Австралия 2:1

Нимчорак финалдан ўрин олган Аргентина - Австралия баҳси анчагина қизиқарли кечди. Унда Жанубий америкаликлар 2:1 ҳисобида рақибдан устун келди.

35-дақиқада Лионель Месси гол уриб, ҳисобни очди. Голгача бўлган дақиқаларга қадар аргентиналиклар бирор марта ҳам аниқ зарба йўллай олмаганди. Бироқ Лео катта санага чиқди. Стандартдан тўпни ўйинга киритди. Ҳимоячилар қайтарган тўпни шериклари яна Мессига узатди. У эса жарима майдони ичидан чап оёғида ерлатиб зарба йўллади. Дарвозабон ожиз қолди.

57-дақиқа ўтиб бораётган бир пайтда Хулиан Альварес дарвозабоннинг хатосидан сўнг ҳисобни 2:0 кўринишига келтириб қўйди.

Йўқотадиган ҳеч нарсаси қолмаган австралияликлар ҳужумга эътибор қаратишди. 77-дақиқада Гудвин жарима майдони ташқарисидан зарба берди. Тўп йўл-йўлакай Энцога теккан ҳолда, Эмилиано Мартинес дарвозасидан жой олди. Қолган дақиқаларда ҳисоб ўзгармай қолди. Шу тариқа, Аргентина чорак финал йўлланмасига эга чиқди.

Лионель Месси ушбу беллашувда бир марта дарвозани ишғол қилди. Шундай қилиб, Лео жаҳон чемпионатлари плей-оффидаги илк голини урди. 35 ёшли ҳужумчи ушбу мундиалдаги учинчи голини урди ва Австралияга қарши ўйиннинг энг яхши футболчиси, дея эътироф этилди.

Шунингдек, Месси Австралияга қарши баҳсда юқори сермаҳсуллик намойиш этди. У вазиятлар яратиш (67) ҳамда рақибнинг очиқ зонасида хавфли ҳужумлар ҳосил қилиш борасида (48) афсонавий Марадонага етиб олди. Шунингдек, Лео рақиб жарима майдони ичида тўпга энг кўп тегиниш бўйича ҳам Диегонинг натижасини такрорлади (103). Қўшимчасига у дриблинг ишлатиш борасида (194) ҳамюртидан ўзиб кетди (188).

Аргентинага қарши ўйиннинг сўнгги сониясида қулай вазиятдан фойдалана олмаган футболчи тарихга кирди. 72-дақиқада Метью Лекки ўрнига Гаранг Куол майдонга тушди. Шу тариқа, Гаранг жаҳон чемпионатлари плей-офф босқичида майдонга тушган Пеледан кейинги энг ёш футболчига айланди. У 18 ёшу 79 кунлигида бу натижага эришди. Пеле 1958 йил 17 ёшу 249 кунлигида плей-оффда ўйнаган.

Энди Аргентина 9 декабрь куни чорак финалда Нидерландия билан баҳс олиб боради.