SPORTS.uz'да жаҳон чемпионати кундалиги (14-сон)

Қатарда жаҳон чемпионати давом этмоқда. SPORTS.uz сайти ижодкорлари ушбу мундиал кундалигини тақдим этади.

Франция Польшани қийинчиликсиз таслим этди. Мбаппе тинмаяпти. У жаҳон чемпионатидаги голлар сони бўйича Роналдуни ортда қолдириб, Мессига етиб олди.

Англия йирик ҳисобда ғалаба қозониб, кейинги босқичга йўл олди. Инглизлар кетма-кет иккинчи бор чорак финалга чиқди.

Франция - Польша 3:1

Нимчорак финал доирасида куннинг илк тўқнашуви Европанинг икки жамоаси ўртасида кечди. Мусобақа фаворити ва амалдаги жаҳон чемпиони Франция Левандовскиси бор Польша билан куч синашди. Унда французлар 3:1 ҳисобидаги ишончли ғалабани қўлга киритди.

44-дақиқада Оливье Жиру учрашувда ҳисобни очди. У Мбаппенинг узатмасидан сўнг тўпни дарвозага жойлади.

74-дақиқада бу сафар Мбаппенинг ўзи катта саҳнага чиқди. Килиан ажойиб ва кучли зарбаси билан фарқни иккитага етказиб қўйди. 90+1-дақиқада Мбаппе яна бир бор поляклар посбонини ранжитди. Унинг зарбаси олдида Шченсни ҳар қанақасига ожиз қолди.

90+8-дақиқа ўтиб бораётганда ҳакам "уч ранглилар" дарвозасига пенальти белгилади. Дастлаб, Левандовскининг уриниши Льорис томонидан бартараф этилганди. Бироқ бу вазиятда ҳакам қоида бузилганини эътироф этди. Унга кўра, дарвозабон чизиқни кесиб ўтган. Шу туфайли қайтадан 11 метрлик жарима зарбаси белгиланди. Бунисида Левандовски хатога йўл қўймади ва ҳисобни қисқартирди - 3:1. Шу тариқа, Франция ғалаба қозониб, чорак финалга йўл олди.

Мбаппе Франциянинг жорий мундиалдаги охирги 6 голида мунтазам иштирок этиб келмоқда. У 4 та гол уриб, 2 ассист муаллифига айланган. Шунингдек, у терма жамоадаги голлари сонини 32 тага етказди ҳамда Зинедин Зидандан ўтиб кетди. Мундиаллардаги голлари эса 9 тага етди. Мессида ҳам шунча гол мавжуд. Роналдуда эса 8 та.

Жиру 52 та гол билан Франциянинг энг яхши тўпурарига айланди. У 51 та гол урган Тьерри Анрини ортда қолдирди.

Уго Льорис Франция терма жамоасида энг кўп сардорлик боғичи остида майдонга тушган футболчи бўлди. У 142 баҳсда жамоасини етакчи сифатида ўйинга бошлаб тушган.

Англия - Сенегал 3:0

Нимчорак финал босқичидан ўрин олган Англия – Сенегал терма жамоалари ўртасидаги ўйинда инглизлар йирик 3:0 ҳисобида ғалаба қозонди.

Дастлаб чап қанотдан уюштирилган ҳужумни Хендерсон муваффақиятли якунлади. У шеригининг пасидан сўнг дарвозани ишғол қилди.

Биринчи бўлимга қўшиб берилган дақиқада англияликлар рақибнинг ҳужумини қайтариш билан бирга қарши ҳужумга чиқиб, гол уришни уддалади. Харри Кейн вазият қаҳрамони.

Танаффусдан кейин ҳам европаликлар ҳужумлар қилишни тўхтатмади. Шундай уринишларнинг бирида Сака ўз номини таблога ёздириб қўйди. Ажойиб ижро.

Йирик ҳисобдаги ғалабадан сўнг "уч шерлар" чорак финалга йўл олди. Ушбу босқичда Саутгейт шогирдларига Франция рақиблик қилади. Ўйин 10 декабрь куни бўлиб ўтади.

Англия терма жамоаси қаторасига иккинчи марта жаҳон чемпионати чорак финал босқичига йўл олди. ЖЧ-2018да Саутгейт шогирдлари тўртинчи ўринни қўлга киритганди. Учинчи ўрин учун кечган баҳсда "уч шерлар" Бельгияга 0:2 ҳисобида имкониятни бой бериб қўйган.

Сенегалга қарши баҳсда Фил Фоден икки ассистни қайд этди. Бу билан Фоден мундиал плей-оффларида 1998 йилдан бери ушбу натижани қайд этган энг ёш футболчига айланди (22 ёш 190 кун). Фақатгина бундан 24 йил олдин бразилиялик Роналдо Данияга қарши баҳсда шерикларига икки марта ассист берган эди (21 ёш 284 кун).

Англия ЖЧ-2022нинг энг одобли жамоаси. Инглизлар ЖЧ-2022да ҳозиргача бирорта карточка олмади. Ушбу мундиал иштирокчилари орасида Англия карточка олмаган ягона жамоа бўлиб турибди. Испанияда битта огоҳлантириш олган футболчи бор, қолган жамоаларда камида иккитадан сариқ карточка мавжуд.

“Челси”дан Англия терма жамоасига таклиф этилган Раҳим Стерлинг Қатардаги жаҳон чемпионатидан Англияга қайтиб кетди.

Ҳужумкор футболчи англияликларнинг нимчорак финалда Сенегалга қарши ўтказган учрашувида Раҳим Стерлингнинг йўқлиги кўпчиликни ҳайрон қолдирди. Футболчи терма жамоа билан Қатарда бўлиб турган пайтда унинг Лондондаги уйида ўғрилик содир этилган. Раҳим Стерлинг оиласидан хабар олиш учун юртига қайтиб кетишга мажбур бўлган.

Бундан бир неча кун аввал “Арсенал” ҳимоячиси Бен Уайт оилавий сабабларга кўра, терма жамоани ташлаб, уйига қайтиб кетган эди.