Сречко Катанецга Қирғизистонга қарши ўйинда осон бўлмайди?!

Бугун Ўзбекистон миллий терма жамоаси "Navruz Cup"даги юришини бошлайди. Биринчи баҳсда "оқ бўрилар"га қарши майдонга қўшниларимиз Қирғиз Республикаси термаси чиқиб келади. Хўш, бугунги рақибимиз ҳақида нималарни биламиз? Унинг ўйин услуби, мураббийнинг "фишка"лари қандай? Тактик схемаси-чи? Шу ва шунга ўхшаш бошқа саволларга SPORTS.uz батафсил жавоб беради.

8 йиллик меҳнат меваси

Рақиб қандай кучга эга? Ўринли савол! Бугунги рақибимиз аллақачон йиғиқ, вазиятга қараб ўйин темпини ўзгартиришга қодир ранг-баранг футбол кўрсатувчи жамоага айланиб бўлди. Александр Крестенин деярли 8 йилдан бери устозлик қилаётган терма яхшигина ўсишга эришди. Айниқса, 2019 йилдаги Осиё чемпионати алоҳида воқеа сифатида эътироф этилиши мумкин. Шунга қарамай, бугунги жамоа БААдаги мусобақада иштирок этганидан кескин фарқ қилади. У анча ёшарган ва асосий куч маҳаллий футболчилардан иборат. Бу йигитларнинг деярли барчаси Крестенин қўл остида "катта бўлгани" боис, кучли жамоавий ўйин намойиш этади.

Энг муҳим омил сифатида россиялик мутахассисни рақибга қараб тактика танлашини алоҳида эътироф этиш даркор. Қаҳрамонимиз фаворитлар билан тўқнашувда 5 ҳимоячи билан майдонга тушса, кучлар тенг келишига ишонган баҳсларида 3 та ҳимоячига суяниб, очиқ футбол таклиф этиши мумкин. Шунингдек, универсал 4-2-3-1 схемасини ҳам рақиб футболчилари яхши ўзлаштирган. Бу рақибда эртанги ўйин учун "А", "Б" ва ҳатто, "C" режалари ҳам мавжуд дегани.

Жамоанинг сўнгги ўйинларини томоша қилар экансиз, Қирғиз футболи ўсганини ҳис қиласиз. Эртанги ўйинда Сречко Катанецдан фарқли ўлароқ, Александер Крестенин ўзи яхши биладиган ва имкониятларига тўғри баҳо бера оладиган футболчилардан фойдаланади. Мураббийлар ўртасидаги тўқнашувда кимни қўли баланд келишини бир неча соатлардан сўнг билиб оламиз.

Ўйин услуби қандай?

Бизникига ўхшаш, аммо сезиларли фарқ мавжуд. Қирғиз Республикаси термаси асосий эътиборни қанотларга қаратади. Жамоа жуда тартибли эмас, аммо бу камчиликни кучли иштиёқ билан беркитишга уринади. Тезкор футболчилар кўп, аммо улар юқори босимга дош бермайди. Шу боис, рақибларимиз тўп назоратини кўпроқ ўзида ушлаб, ўйин темпини бир меъёрда ушлашга уринади. Стандарт вазиятлар кучли рақибларга қарши баҳсларда Крестенин шогирдларининг асосий қуролига айланади. Ўзбекистонга қарши ўйинда ҳам қўшниларимиз минимал имкониятдан максимал фойда чиқаришга уриниб кўриши аниқ. Жамоанинг плюслари ҳақида фикр билдирар эканмиз, минусларини ҳам эътироф этишимиз шарт. Крестенин тузган жамоа қанчалар йиғиқ бўлмасин, мудофаа маркази анча заиф. Айниқса, позицион ҳимоя чоғида бу муаммо яққол кўзга ташланади. Шунингдек, таянч зонасидаги ижрочиларнинг савияси ҳақида илиқ фикрларни билдиришнинг имкони йўқ.

Баҳрайн термаси билан ўйинда бу яққол кўзга ташланди. ҳимоя вакиллари мураббийнинг талабига тўлиқ жавоб бермагани боис, қирғизлар ҳимоявий тактикда ўйнай олмайди. Айниқса, кучли рақиблар билан ўз жарима майдончасига автобус қўйиш имконияти уларда мавжуд эмас. Бу омил Намангандаги тўқнашувда очиқ футболни ҳуш кўрувчи термамизга қўл келиши мумкин.

Сречко Катанецга нима қўл келиши мумкин?

Бу словениялик мутахассиснинг Ўзбекистондаги илк учрашуви! Боз устига, супер атмосфера тақдим этишга қодир наманганлик ишқибозлар кўз ўнгида! Бу катта босим, аммо футболчиларимиз учун эмас. Улар мураббийдан фарқли ўлароқ, ишқибозлар билан тўлиб-тошган аренада тўп суришдан завқ олади. Жаноб Катанец эса, бу мусобақада ғалаба қозониш шарт эканлигини тушуниб турибди. У ишлаган аввалги жойлардан фарқли ўлароқ, Ўзбекистонда биринчи планга доим натижа кўтарилган. Агар Сречко турнирда ўзи учун керакли нуқталарни кўриб олмоқчи бўлганида, асосан маҳаллий футболчиларга суянган ҳолда, янги номларга имконият берган бўларди. Термамиз жанговар таркибда келдими, демак билинг-ки, Мистер Катанец олдига Наманганда шохсупанинг биринчи ўрнига кўтарилиш вазифаси қўйилган.

Футболчиларнинг даражаси ҳақида сўз борар экан, яққол устунлик бизнинг томонимизда эканлиги маълум, аммо майдонда бу иккинчи планга тушиб кетади. Саҳнага терма жамоамиз билан камдан кам ҳолларда ёнма-ён ишлатиладиган сўз - руҳий устунликни тақдим этамиз. Ўзаро ўйинлардаги 8 баҳсда 8 ғалаба. Тўплар нисбати 33:3(!). Бу статистика доимо рақибни қандай кучга эга эканлиги ҳақида ўйлаб чарчаган футболчиларимизга майдонда эркин тўп тепиш имкониятини беради. Агар бугун Элдор гол урса, Машариповдан ажойиб дриблинглар кўрсангиз, ҳимоячиларимиз бехато ўйин ўтказса, ҳайрон бўлиб юрманг.

Катта эҳтимол билан бу баҳсда Катанец ўзининг эҳтиёткор 4-5-1 схемасига мурожаат этса керак. Бу таблодаги ҳисобдан келиб чиқиб ўзгаришларни тезда амалга ошириш имконини яратади. Тўп назорати тўлиқ бизнинг футболчиларимиз томонидан бўлиши даргумон. Сабаби, Катанец тарғиб этаётган футболда рақиб ҳужум қилиши ва тезкор футболчиларимиз ҳаракат қилиши учун бўш зоналар пайдо бўлиши керак. Бу борада Қирғиз Республикаси словениялик мутахассисни "уялтириб" қўймаслиги аниқ. Юқорида айтиб ўтганимдек, Крестенин жамоаси чуқур ҳимояга таяниб футбол ўйнай олмайди.

Жамоаларнинг тахминий таркиби:

Ўзбекистон: Юсупов, Алижонов, Абдуллаев, Ашурматов, Сайфиев, Ҳамробеков, Шукуров, Сидиқов, Ҳамдамов, Машарипов, Шомуродов.

Қирғизистон: Токотаев,Кичин, Акматов, Мишеко, Козубаев,Исраилов, Жиргалибек, Мусабеков, Аликулов,Шукуров, Мурзаев

Cизнингизча баҳс қандай ҳисобда якунланади? Фикрингизни изоҳларда қолдиринг!