Суперклуб етакчи ўйинчисини узоқ муддатга йўқотди

«Ювентус» жамоаси капитани Мануэль Локателли Италия чемпионати доирасида «Милан»га қарши ўтказилган сўнгги учрашувда жароҳат олди.

Ярим ҳимоячи ўйинни охиригача давом эттира олганига қарамай, унинг жароҳати жиддий бўлиши мумкин. Tuttosport нашри хабар беришича, агар шифокорларнинг энг ёмон тахминлари тасдиқланса, 28 ёшли футболчига менискга жарроҳлик амалиёти талаб этилади. Бундай ҳолатда Локателлини камида уч ой майдондан четда қолиши кутилаётгани айтилмоқда.

Футболчининг тикланиш муддати бўйича аниқроқ маълумот сешанба куни маълум бўлади. Шу куни Локателли тўлиқ тиббий кўрикдан ўтади.

13 сентябрь куни Лучано Спаллетти бошқарувидаги жамоа Италия чемпионатининг тўртинчи турида сафарда «Сассуоло»га қарши майдонга тушиши режалаштирилган.