Суперлига. Бугун 7-тур старт олади

Бугун Суперлига 7-тури доирасидаги икки учрашув бўлиб ўтади. Бекободнинг "Металлург" жамоаси ўз уйида "Қизилқум"ни қабул қилади. Ўйин 19:00да старт олади ва "Foreign languages" телеканали орқали тўғридан-тўғри эфирга узатилади. 

“Металлург” ҳамда “Қизилқум”нинг ўзаро тўқнашувлари статистикасига назар ташлайдиган бўлсак, жамоалар бугунгача Суперлигада 48 та ўйин ўтказишди. Шуларнинг 18 тасида “Металлург” ғалаба қозонган. 12 та учрашувда кучлар тенг келган. 18 та ўйинда эса “Қизилқум”нинг қўли баланд келган. Киритилган ва ўтказиб юборилган тўплар фарқи 62:61, “Металлург” фойдасига. Бекободликлар бу рақибни икки марта 4:1 ҳисобида ютган (2006, 2019). “Қизилқум” эса битта учрашувда пўлат қуювчилар дарвозасига жавобсиз бешта тўп (0:5, 2006) киритган.

Бундан ташқари, Тошкентнинг "Пахтакор" клуби "Олимпик" меҳмони бўлади. Учрашувни "Спорт" телеканали орқали жонли эфирда томоша қилишингиз мумкин. 

Чемпионатлар тарихида ҳозирча жамоалар тўрт бор тўқнаш келган. Бир ўйинда “Пахтакор”, яна бирида “Олимпик” зафар қучган, икки учрашув 1:1 ҳисобидаги дуранг билан якунланган. "Пахтакор" 6 гол уриб, 5 тўп ўтказиб юборган. Шунингдек, Кубокдаги бир тўқнашув “шерлар”нинг фойдасига ҳал бўлган.