Суперлига. "Сўғдиёна" - "Динамо": Ўзаро учрашувларда устунлик ким томонда?

Бугун Суперлига 1-даврасидан ўрин олган сўнги 2 ўйин бўлиб ўтади. Кун доирасида ўтказилиши кутилаётган “Сўғдиёна” - “Динамо” баҳси кўпчиликнинг диққат-марказида бўлиб турибди. Сабаби, иккала жамоа учун ҳам навбатдаги 3 очко сув ва хаводек зарур. Қўлга киритилажак эҳтимолий ютуқ катта эҳтимол клубларнинг турнир жадвалидаги ўрнига ҳам ижобий таъсир кўрсатиши мумкин.

Жиззахликларнинг ғалабаси “Насаф” ва “ОКМК” каби етакчиларга тенглашиб олиш имкониятини берса, “Динамо”нинг зафар қучиши уларни ҳавфли зонадан бироз узоқлаштиради. Шу боис беллашув қизиқарли ўтишига шубха йўқ.

Тарихга назар ташлайдиган бўлсак, жамоалар шу пайтгача ўзаро 42 маротаба куч синашган. Шундан 16 та ўйинда “Сўғдиёна”нинг қўли баланд келган бўлса, яна 18 та баҳсда “Динамо” ғалаба қозонган. Қолган 8 ўйин дуранг натижа билан тугаган. Тўплар нисбати 46:60 самарқандликлар фойдасига. Шу пайтгача қўлга киритилган энг йирик ғалаба Иван Бошкович шогирдларида 3:0 ҳисобида қайд этилган. Вадим Абрамов устозлигидаги клубда бу кўрсаткич 4:0 хисобланади.

Муросасиз кечиши кутилаётган мазкур беллашувни Султонмурод Абдураҳмонов бошчилигидаги ҳакамлар бригадаси бошқариб боради. Унга қанотларда Даниел Ятсенко ва Амир Галиев яқиндан ёрдам бериб боришади. Заҳира ҳаками вазифасида Ерлан Нуржанов. ВАР рефериси Фирдавс Норсафаров бўлса, АВАР да Алишер Усмонов ишлайди. Назоратчи Файзуллох Хасанов. Комиссар этиб Феруз Ғаниев тайинланган.

Баҳс соат 20:00 да Жиззаҳдаги “Марказий” ўйингоҳида старт олади ва “Спорт” телеканали орқали тўғридан-тўғри эфирга узатилади.