Supertoʻpurar Madridga vafo qilmadi va ashaddiy raqibni tanladi

Madridning “Atletiko” jamoasi hujumchisi Xulian Al’vares Kataloniyaning “Barselona” klubiga qo‘shilish maqsadida “matraschilar”ning yiliga  10 million yevro ko‘rsatilgan yangi shartnomasini qabul qilmadi.

Bu haqida ispanlarning mashhur manbasi Marca nashri xabar berdi.

Manba ma’lumotiga ko‘ra, kataloniyaliklar uchun ushbu transferdagi asosiy muammosi “Atletiko” futbolchi uchun kamida  150 million yevro talab qilayotganidir. Chunki uning amaldagi shartnomasi 2030 yil yozigacha mo‘ljallangan va tovon puli  500 million yevro ekani belgilangan.

Argentinalik yulduzning o‘zi esa “o‘zi uchun istiqbolliroq loyiha” sifatida ta’riflanayotgan “Barselona”ga o‘tishni istamoqda.

Avvalroq futbolchiga “Pari Sen-Jermen” va “Arsenal” kabi qudratli klublar ham jiddiy qiziqish bildirayotgani xabar qilingan edi.

Ushbu mavsumda Al’vares 49 ta uchrashuvda qatnashib, 20 ta gol urdi va to‘qqizta assist amalga oshirdi. Transfermarkt portali 26 yoshli argentinalik forvardni 90 million yevroga baholamoqda.