Супертўпурардан воз кечишди

“Ньюкасл”нинг ҳозирги кундаги энг зўр тўпурари Александр Исаакнинг “Ливерпуль”га трансфери амалга ошмайдиган бўлди. Бу ҳақда таниқли инсайдер Саша Тавольери хабар тарқатди.

Англия чемпионлари швециялик ҳужумчини олиш учун “Ньюкасл”га бир неча бор расмий таклиф юборди. Охирги таклифда 138 миллион евро бадал пули кўрсатилди. Бироқ ньюкаслликлар бу суммани ҳам қабул қилмади. Улар ўйинчини олиб қолиш мақсадида 170 миллион евро талаб қиляпти. Ҳали Англия футболида ҳеч бир футболчи учун бунақа катта сумма тўланмаган.

Александр Исаак “Ньюкасл”нинг қарорига норозилик билдириб, машғулотларга қатнашмай қўйди, расмий учрашувларга ҳам келмаслигини уқтиряпти.

Бу жараёнда “Ливерпуль” 25 ёшли форвард трансферидан воз кечадиган бўлди. Арне Слот жамоасини Исаакнинг келишини узоқ кутмасликка ва эътиборини бошқа трансфер нишонларига қаратишга қарор қилди.