Сув полоси. Терма жамоаларимизнинг қитъа чемпионатидаги рақиблари маълум

Сув полоси бўйича Осиё чемпионатида иштирок этадиган Ўзбекистон эркаклар ва аёллар терма жамоасининг рақиблари маълум бўлди.

Миллий Олимпия қўмитаси матбуот хизматининг хабар беришича, 7-14 ноябрь кунлари Таиланднинг Самутпракан шаҳрида ушбу спорт тури бўйича қитъа биринчилиги бўлиб ўтади. Мусобақада жами 18 та жамоа иштирок этади. Эркаклар баҳсида 11 та мамлакат термалари 2 гуруҳга бўлинган ҳолда чемпионатни бошлайди. Йигитларимиз унда “А” гуруҳидан ўрин олган. 7 та аёллар жамоаси эса ягона гуруҳда айлана тизимида ўтадиган беллашувларда ғолиблик учун курашга киришади.

Вакилларимиз жой олган гуруҳлар билан танишинг:

Аёллар: Ўзбекистон, Япония, Хитой, Корея Республикаси, Таиланд, Қозоғистон, Сингапур.

Эркаклар: Ўзбекистон, Эрон, Қозоғистон, Таиланд, Корея Республикаси, Ҳиндистон.

Терма жамоаларимиз айни кунларда Республика олий спорт маҳорат мактабининг сузиш ҳавзасида машғулотларни олиб бормоқда.