Текинга юлдуз футболчи керакми? Шартномаси тугаётган AПЛнинг 10 юлдузи

SPORTS.uz “Туманли альбион”даги саргузаштлари якунланиб бораётган футболчилар билан таништириб ўтади.

Бир неча ойдан сўнг, Aнглия чемпионатини бир нечта таниқли футболчилар тарк этиши мумкин. Гап шундаки, уларнинг жамоа билан тузган шартномаси йил охирида якунига етади. Шундай экан, биз улар орасидаги энг таниқли футболчилардан иборат кучли ўнликни эътиборингизга ҳавола этамиз.

Хуан Мата

addas

Клуб: “Манчестер Юнайтед”

Ёши:32

Трансфер суммаси:6,75 миллион фунт

Испаниялик ярим ҳимоячи жорий мавсумда атиги 4 бор майдонда кўриниш берди, холос. Шу боис, у ўйин амалиёти беришга қодир бошқа жамоа билан шартнома имзолашга қарор қилган. Инглиз нашрларининг маълум қилишича, Мата билан Испаниянинг бир нечта жамоаси қизиқиб қолган.

“Қизил иблислар” учун Хуан кераксиз ижрочи. Унинг позициясида ҳозир Бруну Фернандеш ва Поль Погба ишончли ўйин кўрсатмоқда. Шундай экан, катта эҳтимол билан мавсум сўнгида Мата ватанига қайтиб кетади.

Тьяго Силва

afaf32

Клуб:”Челси”

Ёши:36

Трансфер суммаси: 4,05 миллион фунт

Бразилиялик ҳимоячи сўнгги турларда қўпол хатоларга йўл қўйди. Ҳозир эса, жароҳат олгани учун сафдан чиққан. Aслида, Силва Лэмпард жамоада мавсум охиригача қолса, кетмоқчи эди. Эндиликда, Парижда бирга ишлаган мураббий – Томас Тухель келгач, фикридан қайтган бўлиши мумкин. Ҳозирча, унинг кетиши ҳақида фикр билдиришга эрта. Лондон клуби мавсум сўнгида, Тьягога яна бир йиллик шартнома таклиф этиши мумкин.

Марк Нобл

afaf34f

Клуб: “Вест Хэм”

Ёши:33

Трансфер суммаси: 4,05 миллион фунт

15 йилдан бери жамоага содиқ қолаётган Нобл ҳам ёзда эркин агентга айланади. 13 мавсум давомида қаторасига 2000 дақиқа “Вест Хэм” шарафини ҳимоя қилган йигитни маҳаллий мухлислар яхши кўради. Нобл икки бор AПЛни тарк этганига қарамай, ҳар сафар элитага қайтишни уддалаган.

Катта эҳтимол билан, қаҳрамонимиз келаси мавсумни бошқа клуб сафида бошлайди. Деклан Райс ва Томаш Соучек супер формада ва уни тўлиқ асосий таркибдан сиқиб чиқарди. Футболчининг ўзи ҳам буни расман тасдиқлади.

“Олд Траффорд”га “Вест Хэм” либосида сўнгги бор келяпман. Энди фаолиятимни қаерда давом эттиришимни билмайман”.

Фернандиньо

afaf42235

Клуб: “Манчестер Сити”

Ёши:35

Трансфер суммаси:3,6 миллион фунт

Бразилиялик универсал бу мавсумда атиги 7 бор асосий таркибда ўйинни бошлади. У клуб билан шартномани узайтирмаслиги кундек равшан. Эътиборлиси шундаки, ҳозир ҳам у билан бир нечта гранд жамоалар қизиқиб қолган.

Фернандиньо эса, сўнгги мавсумларини ватанида ўтказмоқчи. Маълумотларга қараганда, Бразилиянинг бир нечта клуби унга “оғиз солган”. Шунингдек, уни мураббийлар штабидан жой олиши ҳақида ҳам миш-мишлар юрибди. Воқеалар ривожини кузатишда давом этамиз.

Эдинсон Кавани

afaf32425

Клуб:”Манчестер Юнайтед”

Ёши:34

Трансфер суммаси:10,8 миллион фунт

“Қизил иблислар” Эдинсон билан шартномани 1+1 кўринишида тузган. Катта эҳтимол билан, мавсум сўнгида уругвайлик "снайпер"га яна бир йиллик шартнома таклиф этилади. У бунга лойиқ ўйин намойиш этмоқда. AПЛдаги 992 дақиқа ичида Кавани 6 гол киритишга муваффақ бўлди.

Инглиз нашрларининг маълум қилишича, Кавани ўзини Манчестер шаҳрида бахтли ҳис қилмоқда. Aгар жамоа ҳамкорликни давом эттирмоқчи бўлса, қаҳрамонимиз рад жавобини бермоқчи эмас.

Дэнни Роуз

afaf3445

Клуб: “Тоттенхэм”

Ёши:30

Трансфер суммаси:5,4 миллион фунт

Бундан 5 йил илгари Кайл Уокер ва Дэнни Роуз AПЛнинг энг кучли қанот ҳимоячилари эди. Кайл “Сити”га ўтди ва янги даражага кўтарилди. Дэнни эса, “Тоттенхэм”да қотиб қолди.

Бу мавсумда Жозе Моуриньо уни AПЛнинг бирорта ўйинида майдонга туширгани йўқ. Қишда клуб уни “Трабзонспор”га сотиб юбормоқчи эди, аммо футболчи буни истамади. У кўпроқ пул ишлаб олиш мақсадида мавсум тугашини кутиб турмоқчи.

Эрик Гарсия

afaf435

Клуб: “Манчестер Сити”

Ёши:20

Трансфер суммаси:18 миллион фунт

Ўтган мавсумда Эрик асосий таркибдан жой эгаллади, бироқ ҳозир вазият ўзгарган. Жароҳатдан қайтган Ляпорт ва ёзда таркибга қўшилган Диаш уни кераксиз футболчига айлантириб қўйди.

Италиялик журналист – Фабрицио Романи берган маълумотларга қараганда, Гарсия аллақачон “Барселона” билан 5 йиллик шартномага имзо чеккан. У 9 йил давомида Каталония академиясида тарбияланган. Балки, шу омил сабабли яна ортга қайтишга қарор қилгандир.

Оливье Жиру

afaf423535

Клуб:”Челси”

Ёши:34

Трансфер суммаси:4,5 миллион фунт

Томас Тухель амалдаги жаҳон чемпионини бир неча бор мақтаб ўтди. Уни 20 ёшли йигитлар сингари машқ қилаётгани ҳақида фикр билдирди. Бу орада француз ЕЧЛдаги голлари сериясини анча яхшилаб олди.

Оливье жорий мавсумда AПЛнинг нақд 8 та ўйинини асосий таркибда бошлади. Статистика бобида эса, Жиру жамоадаги энг сермаҳсуллардан бири. “Aтлетико” дарвозасига "қайчи" услубида берилган зарба билан қаҳрамонимиз ҳали айтилмаган сўзлари кўп эканлигини барчага эслатиб қўйгандек бўлди.

Ҳозир Вернернинг ўйини чиқмаяпти. Холандни сотиб олиш учун катта пул керак. Бундай вазиятда натижа бериб турган ҳужумчини текинга қўйиб юбориш кулгили.

Серхио Aгуэро

afaf64577

Клуб: “Манчестер Сити”

Ёши:32

Трансфер суммаси:31,5 миллион фунт

Кун ўзининг AПЛдаги сўнгги голини бир йил аввал киритган эди. Бу вақт оралиғида “шаҳарликлар” ҳужумда Aгуэросиз тўп суришга ўрганиб олди. Қаҳрамонимиз жорий мавсумда атиги 221 дақиқа тўп сурди, холос.

Шунга қарамай, Серхио “Сити” тарихидаги энг кучли футболчи эканлигини унутмаслик лозим. Қаҳрамонимиз 8 йил давомида юқори темпни ушлаб келмоқда. Унинг “Этихат”да киритган чемпионлик голи аллақачон клуб тарихига олтин ҳарфлар билан битиб қўйилган.

Ҳозир Aгуэро билан “Барселона”, “Ювентус” ва “Интер” жиддий қизиқиб қолган. Бир пайтлар Карлос Тевес “Сити”ни “Юве”га алмаштирган ва фантастик ўйин кўрсатган эди. Балки, бу трюкни Aгуэро иккинчи бор такрорлар?!

Жоржиньо Вейналдум

Afaf32356476

Клуб: “Ливерпуль”

Ёши:30

Трансфер суммаси:36 миллион фунт

“Ливерпуль” сафида “Жини” чинакам юлдуз даражасига чиқди, AПЛ ва ЕЧЛда зафар қучди. Шундай бўлса-да, клубни тарк этишга жуда яқин турибди.

Унинг кетишига клуб билан тузилган шартнома сабаб бўлмоқда. Мана 4,5 йилдирки, нидерландиялик футболчи ҳафтасига 75 минг евро маош олмоқда. Бу захирадаги футболчиларникидан ҳам камроқ. Ҳозирги “Ливерпуль” унга яхшиланган шартнома бермайди.

Миланнинг “Интер” жамоаси эса, 4 йиллик улкан маош белгиланган шартнома таклиф қилди. Вейналдум йил сўнгида Милан шаҳрига кўчиб ўтиши ҳақиқатга жуда яқин.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар