Терма жамоа ҳужумчиси "Лилль"га ўтмоқда

Япония терма жамоаси ва «Фейеноорд» ҳужумчиси Аясэ Уэда яқин кунларда жамоасини алмаштириши кутилмоқда. Япон футболчиси фаолиятини Франция чемпионатида давом эттириб, «Лилль» сафида тўп суриши режалаштирилган.

Футбол бўйича инсайдер Фабрицио Романо тарқатган маълумотга кўра, 28 ёшли Уэда «Лилль» билан келишувга яқин. Франция клуби ҳужумчи учун тахминан 15 миллион евро тўлаши айтилмоқда. Аясэ Уэда «Фейеноорд» таркибига 2023 йил ёзида қўшилган эди. Унгача у Японияда «Касима Антлерс» жамоасида, шунингдек, Бельгиянинг «Серкль Брюгге» клубида ўйнаган.

Эслатиб ўтамиз, ўтган мавсумда Уэда Нидерландия чемпионатида «Фейеноорд» таркибида 31 та ўйинда майдонга тушди. Япон ҳужумчиси шу муддат ичида 25 та гол урди ва бир бор голли узатма берди. Жорий мавсумда эса у тўртта ўйинда учта гол ва бир ассист қайд этишга улгурди.