Тез орада эълон қилинадиган трансферлар

Трансферлар ойнасининг сўнгги ҳафталарига етиб келдик. Чемпионатлар ҳам бошланган ва мураббийлар таркибидаги камчиликларни билиб олмоқда. Шундай экан бизни олдинда катта трансферлар кутиб тургани аниқ. Айрим жамоалар харидларни деярли ҳал қилиб қўйди. Шунчаки энди уни эълон қилиш қолган. 

Флориан Балогун

"Арсенал" академиясидан чиққан ҳужумчи ўтган мавсум кўпроқ ўйин амалиётига эга бўлиш учун "Реймс" клубига ижарага берилди. 22 ёшли страйкерга Франция чемпионати ёққан шекилли, кетма-кет голлар уришни бошлади. Якунига етган мавсумда Балогун рақиблар дарвозасига 22 та тўп киритишга муваффақ бўлди. Ушбу натижага "канонирлар"нинг ҳеч қайси футболчиси эриша олгани йўқ. Буни билган Флориан Артетадан асосий таркибда ўйнамоқчилигини айтди ва рад жавобини олди. Шундан сўнг ҳужумчи учун бир қатор клублардан таклифлар келди. "Интер", "Милан" ва "Вест Хэм" каби жамоалар унга қизиқиш билдирди, лекин лондонликлар бу трансфердан камида 45 миллион фунт ишлаб олмоқчи эди. Ёз охирлаб қолганидан кейин клуб нархни туширди ва "Монако" билан 40 миллион евролик келишувга эришди. Футболчи тиббий кўрикдан ҳам ўтиб бўлган. 

Муҳаммад Қудус 

Топ клублар эътиборига тушган ва анчадан бери "Аякс"дан кетишга ҳаракат қилаётган Қудус фаолиятини АПЛда давом эттирадиган бўлди. Уни "Вест Хэм" ўз таркибига қўшиб олмоқда. Трансфер "болғачилар"га 45 миллион еврога тушди. Ярим ҳимоячи билан эса 5 йиллик шартнома имзоаланади. Унга "Челси" ҳам қизиқиш билдирди, лекин расмий таклиф билан чиқмади. Ундан кўра Мойсез Касйедога эътибор қаратилди. Қудус тез орада тиббий кўридкан ўтиш учун Лондонга йўл олиши кутилмоқда. "Вест Хэм" ушбу ёзда яхши трансферларни амалга оширмоқда. Эдсон Альварес, Константинос Мавропанс, Жейсм Уорд-Проуз каби футболчилар жамога келиб қўшилди.

Киран Тирни

"Арсенал" катта трансферларни амалга оширганидан кейин таркибдаги баъзи футболчиларга чиқиш эшикларини кўрсатди. Улар орасида шотландиялик ҳимоячи ҳам бор. Тирни "Реал Сосейдад"га сотиб олиш шартисиз ижарага ўтмоқда. Раҳбарият уни сотиши ҳам мумкин эди, лекин айтарли таклиф тушмагани сабаб ижарага беришга қарор қилди. Киран 2019 йили 27 миллион евро эвазига "Селтик"дан келган.  

Бето

АПЛ стартида кетма-кет мағлубиятларни қабул қилиб олаётган "Эвертон" янги ҳужумчи сотиб олишга қарор қилди. Бу қарор Калверт-Льюн жароҳат олиб, анча вақтга сафдан чиққанидан кейин қабул қилинди. "Удинезе" аъзоси Бето ўтган ёзда Италия клубига ўтган. У жамоаси сафида 34 та ўйинда қатнашиб, 10 та гол уришга муваффақ бўлган. Ушбу трансфер мерсисайдликларга 30 миллион еврога тушмоқда. "Удинезе" Бетонинг Англияга йўл олишига рухсат берган ва футболчи тез орада тиббий кўрикдан ўтади. 

Карлос Балеба

Кайседо "Брайтон"ни тарк этганидан кейин жамоа унинг ўрнига яри ҳимоячи излади ва "Лилль"дан Балебани ўз таркибига қўшиб олишга яқин турибди. Томонлар оғзаки келишувга эришган. Англия клуби ёш истеъдод учун 27+3 миллион евро тўлайдиган бўлди. 19 ёшли хавбек ўтган мавсум 25 та ўйинда майдонга тушиб, 2 та ассист амалга оширган.