Тезкор! "Навбаҳор" ва "Аякс" ўртасида футбол ҳамкорлиги тузилди

Наманганнинг "Навбаҳор" клуби Нидерландиянинг машҳур "Аякс" клуби билан халқаро ҳамкорликни бошлади.

Томонлар ўртасида тузилган келишувга кўра, "Аякс" "Навбаҳор"нинг ёшлар академияси ривожланиши ва унинг фаолиятини мувофиқлаштиришда ўз ёрдамини кўрсатади. Ҳамкорлик Амстердам клубининг футбол фалсафаси ва методологияси асосида амалга оширилади.

Ушбу келишув "Навбаҳор"нинг Ўзбекистонда энг кучли академиялардан бирини яратиш мақсадини қўллаб-қувватлайди.

"Навбаҳор" вице-президенти Акрам Дедабаев бу ҳамкорликни Марказий Осиё клублари учун муҳим қадам сифатида баҳолади.

"Бизнинг клуб учун “Аякс” билан бу келишувни имзолаш катта фахр. Уларнинг синовдан ўтган методологияси ва Ўзбекистонда спортни ривожлантиришга қаратилган эътибори бизга катта имконият беради", — деди у.

"Аякс" футбол директори Марийн Беукер эса ушбу ҳамкорлик клубнинг халқаро таъсирини кенгайтиришда муҳим босқич эканини таъкидлади.

Ҳамкорлик доирасида "Аякс" Мексика, Австрия, Италия, Испания, Греция, БАА ва Япония каби мамлакатлардаги клублар тармоғига "Навбаҳор"ни ҳам қўшди.