Тўрт нафар боксчимиз финалга йўл олди!

Бугундан Жаҳон кубогининг ярим финал баҳслари старт олди.

Дастлаб, -48 кг вазн тоифасидаги вакиламиз Фарзона Фозилова польшалик Aнжелика Кристафорсзкага қарши баҳс юритди.  Фарзона жангда тўлиқ устунлик қилди ва 5:0 ҳисобида зафар қучиб, финалга йўл олди. 

- 60 кг вазндаги вакиламиз Ситора Турдибекова ҳам ярим финал жангини ўтказди. Ситорага бу босқичда қозоғистонлик Виктория Грефеева билан тўқнаш келди. Қизиқарли кечган жангда афсуски Турдибекова 1:4 ҳисобида имкониятни бой бериб қўйди ва бронза медали билан чекланди. 

-60 кг вазн тоифасида Абдумалик Ҳалоков ҳам ярим финалда рингга кўтарилди.  Абдумалик бу босқичда болгариялик Радослав Росеновга қарши баҳс юритди. Биринчи раундда 5:0 ҳисобида устунлик қилган вакилимиз иккинчи раундда ҳам 4:1 ҳисобида ғалаба қозонди. 3 раунд ҳам 4:1 билан натижа билан якунланди. Шу тариқа жанг 4:1 ҳисобида Ҳалоковнинг ғалабаси билан тугади ва у финалга йўл олди.

+80 кг вазн тоифасидаги вакиламиз Олтиной Сотимбоева принципиал рақибасига айланиб улгурган қозоғистонлик Дина Исламбекова билан куч синашди. Бу уларнинг жорий йилдаги 3- тўқнашуви эди. Дастлаб “Странджа” турнирида Олтиной ғалаба қозонган бўлса, Мўғулистондаги Осиё чемпионатида Исламбекова зафар қучганди. Трилогияда эса вакиламиз 5:0 ҳисобида ғалабага эришиб, умумий ҳисобни 2:1 кўринишга олиб келиш баробарида финал масаласини ҳам ҳал қилди.

-85 кг вазн тоифасида Акмалжон Исроилов ярим финал баҳсида италиялик Паоло Карусога қарши рингга кўтарилди. Жанг жуда муросасиз кечди. Аммо якун биз учун кутилмаган бўлди. Ҳакамлар 2:3 ҳисобида Карусонинг ғалабасини эътироф этишди.Бизда навбатдаги бронза!

-90 кгда Тўрабек Ҳабибуллаев ҳам ярим финал жангида иштирок этди. Унга бу босқичда мезбон, хитойлик Хуезен Хан рақиблик қилди. Жангда тўлиқ устунлик қилган Тўрабек ҳар уч раундда 5:0 ҳисобида устун келди ва финал йўлламансига эга чиқди.

Маълумот учун, бизни олдинда 5 нафар боксчимизнинг жанги кутмоқда. Бу ҳақда Ўзбекистон бокс федерацияси хабар берди.