Тошкентда каратэ бўйича халқаро турнир ўтказилади

Жорий йилнинг 15-16 июнь кунлари Тошкент тумани марказидаги туман спорт мактабига қарашли "Универсал" спорт мажмуасида каратэ WKF бўйича v-анъанавий "KELES OPEN-2024" халқаро турнири бўлиб ўтади. 
Ёшлар, ўсмирлар ва катталар ўртасида бешинчи бор ўтказилаётган мазкур халқаро турнирда Ўзбекистон, Қозоғистон, Тожикистон, Туркманистон, Қирғизистон ҳамда Россия давлатидан энг сара каратэчилар иштирок этиши кутилмоқда. 
Тошкент тумани ҳокимлиги, Тошкент вилояти спорт бошқармаси, Ўзбекистон каратэ (WKF) ассоциацияси, Ёшлар ишлари агентлиги, Тошкент тумани спорт мактаби ва бошқа қатор масъул ташкилотлар "Keles karate" спорт клуби билан ҳамкорликда ўтказилаётган ушбу халқаро мусобақани юқори савияда ўтказиш учун ҳозирда тайёргарлик ишлари олиб борилмоқда.

Мусобақадан кўзланган асосий мақсад - Ўзбекистон Республикаси Президентининг 2023 йил 3 ноябрдаги "Каратэ (WKF) спорт турини янада ривожлантириш чора-тадбирлари тўғрисида" ги 356-сонли қарори ижросини таъминлаш, ёшларни жисмоний тарбия ва спортга, хусусан, каратэ спорт турига бўлган қизиқишларини орттириш, иқтидорли спортчиларни саралаш ва терма жамоаларга жалб этишдан иборат бўлади.