Артета январда биринчи олинадиган футболчини танлади

Лондоннинг «Арсенал» жамоаси қишки трансфер ойнасида «Лейпциг» ва Норвегия терма жамоаси вингери Антонио Нусани яна бир бор ўз сафига қўшиб олишга ҳаракат қилмоқчи, деб хабар бермоқда CaughtOffside нашри ўз манбасига таяниб.

Нашр манбаларига кўра, 21 ёшли футболчи ҳужумнинг чап қанотини кучайтириш учун асосий номзод сифатида кўрилмоқда. «Арсенал» унинг трансфери ҳақида ёздаёқ ўйлаб кўрган, аммо келишув амалга ошмаган. 

Микель Артета бошчилигидаги мураббийлар штаби норвегиялик футболчининг тезкорлиги ва рақибни яккама-якка дриблинг билан енгиб ўтиш маҳоратини юқори баҳоламоқда.

«Лейпциг» бош мураббийи Оле Вернер ҳам Антонио Нусага катта умид боғлаётганини яширмаган.

«Бу яқин йиллар ичида жаҳон даражасидаги футболчига айланадиган ўйинчи», — деган Вернер ZDF телеканалига берган интервьюсида.

Шу билан бирга, «Арсенал» рўйхатида «Ювентус» вингери Кенан Йилдиз ҳам қолмоқда. Бироқ уни сотиб олиш учун жуда катта молиявий таклиф талаб этилиши айтилмоқда. CaughtOffside таҳлилига кўра, Нусани олиш варианти лондонликлар учун ҳозирча анча реал ва амалий кўринаяпти.