"Тоттенхэм" янги мураббий изламоқда

"Тоттенхэм" клуби раҳбарияти янги бош мураббий лавозимига бир нечта номзодни кўриб чиқмоқда. Бу ҳақда "Teamtalk" нашри хабар берди.

Ҳозирги мураббий Анже Постекоғлу чемпионатдаги қониқарсиз натижалари туфайли истеъфога чиқарилиш арафасида турибди. Айни пайтда жамоа турнир жадвалининг ўн бешинчи поғонасида бормоқда, бу "шпорлар"нинг 1994 йилдан буён энг ёмон натижаси ҳисобланади.

Ҳозирча мураббийнинг Еврокубоклар орқали ўзини оқлаш имконияти сақланиб қолмоқда. Европа Лигасида унинг шогирдларини "Айнтрахт" билан жавоб учрашуви кутмоқда (биринчи ўйинда 1:1 ҳисоби қайд этилган эди).

"Тоттенхэм" "Борнмут" бош мураббийи Андони Ираоланинг хизматларига жуда катта қизиқиш билдирмоқда, бироқ раҳбарият унинг кетмаслиги учун барча чораларни кўришни режалаштирган. Постекоглунинг ўрнига бошқа номзодлар қаторида "Фулхэм"дан Марк Силва ва "Брентфорд"дан Томас Франк ҳам тилга олинмоқда.