Трамп: Инфантино АҚШ ва Хитойга жаҳон чемпионатини бирга ўтказишни таклиф қилди

АҚШ президенти Дональд Трамп ФИФА президенти Жанни Инфантино билан ўтказилган қўшма матбуот анжуманида яна бир футбол бўйича жаҳон чемпионатини қабул қилишга тайёр эканини маълум қилди.

Трампнинг таъкидлашича, келгуси сафар АҚШ мусобақани Канада ва Мексика иштирокисиз ҳам мустақил равишда юқори даражада ўтказиш имкониятига эга.

«Яна бир ғоя бор: Жанни менга кейинги жаҳон чемпионатини Хитой ва АҚШ биргаликда қабул қилиши мумкинлигини айтди. Футболчилар учун ўйинлар орасидаги парвозлар қисқа ва қулай бўларди. Уларга бу, шубҳасиз, ёққан бўларди», – дея Трампнинг сўзларини келтиради Fox News.

Эслатиб ўтамиз, 2030 йилги жаҳон чемпионатига Испания, Марокаш ва Португалия мезбонлик қилади. Турнирнинг 100 йиллик юбилейи муносабати билан бир қатор учрашувлар Жанубий Америкада – Аргентина, Уругвай ва Парагвайда ўтказилиши режалаштирилган.

2034 йилги жаҳон чемпионати Саудия Арабистонида бўлиб ўтади. 2038 йилдаги мусобақага эса ҳали мезбон мамлакат аниқланмаган.