Трамп жаҳон чемпионатига Эрон ўрнига Италияни олиб келмоқчи

АҚШ президенти Дональд Трампнинг махсус вакили Паоло Замполли 2026 йилги жаҳон чемпионатида Эрон миллий терма жамоаси ўрнига Италия миллий терма жамоасини иштирок эттиришни таклиф қилди.

- Мен АҚШ президенти Дональд Трампга ва ФИФА президенти Жанни Инфантинога жаҳон чемпионатида Эрон ўрнига Италияни қўшишни таклиф қилганимни тасдиқлайман.

Мен келиб чиқишим бўйича италияликман ва АҚШда ўтказиладиган турнирда Италияни кўриш орзум эди. Улар тўрт карра жаҳон чемпиони сифатида турнирда иштирок этишга муносиб, - деди Паоло Замполли.

Бу ҳақда The Guardian ва Financial Times каби нуфузли манбалар маълумот тарқатди.

Жаҳон чемпионатининг “G” гуруҳида Эрон футболчилари Бельгия, Янги Зеландия ва Миср миллий терма жамоаси билан ўйнаши белгиланган.

Эслатиб ўтамиз, Италия ҳал қилувчи саралаш ўйинида Босния ва Герцеговина миллий терма жамоасига мағлуб бўлиб, турнирга йўлланма ола олмади.