Трамп Мессининг ўйинини таҳлил қилди: "Мен футбол ҳақида бироз биламан"

2026 йилги жаҳон чемпионати ярим финалида Англия ва Аргентина терма жамоалари ўртасидаги беллашув АҚШ президенти Дональд Трамп эътиборидан ҳам четда қолмади. У учрашув ҳақидаги таассуротлари билан ўртоқлашар экан, айниқса Лионель Месси ўйинига алоҳида тўхталди.

«Мен футбол ҳақида бироз тушунчага эгаман. Мессига [Англияга қарши ўйинда] қараб турдим: уни қаттиқ назорат қилишди, тўғрими? Жуда қаттиқ.

Бир пайт у тўсатдан ўнг қанотда пайдо бўлди. Тушуняпсизми? Билмайман, бунга яна кимдир эътибор бердими-йўқми... Мен шунчаки буни пайқадим. Ҳеч ким бу ҳақда гапирмади.

Мен бу ҳолатни кўриб, ўйладим: «Уни жуда қаттиқ қоплаётган ажойиб футболчи бор». Кейин Месси ўнг томонга силжиди – ўша футболчи эса жойида қотиб қолди.

Мессида етарлича вақт пайдо бўлди. У тўпга зарба берди. Бу, мен айтган бўлардим, идеалдан тахминан чорак дюйм узоқликда эди. Ва ўйин шу билан якунланди. Бу ажойиб эди», – деди Трамп.

Унинг эслатишича, Месси бундан олдин Жазоирга қарши учрашувда ҳам хет-трик қайд этган, бу эса, Трамп таъкидлаганидек, жуда кам учрайдиган ҳолат.

«Бундай улуғ футболчилар шундай ишларни қайта-қайта амалга оширади, деб ўйлайман. Улар табиатан ўзига хос истеъдод билан туғилади. Роналду – шулардан бири. Бу йиллар давомида у билан танишиб олдим, у жуда яхши инсон», – дея қўшимча қилди АҚШ президенти.

Трамп шунингдек Англия терма жамоаси етакчиси ҳақида ҳам фикр билдирди: «Англияда мен гольф ўйнаган ажойиб футболчи бор. Бу – Харри Кейн, у ўзини фантастик тарзда кўрсатди. Унга ҳимояда ўйнашни топшириш – хатолик бўлди, деб ўйлайман», – деди у.