“Турон” клуби олиб бораётган трансфер сиёсати қанчалик тўғри?

Клубларимиз янги мавсум олдидан ўз таркибларини кучайтиришга уриняпти. Керакли футболчилар сафга қўшилмоқда, захирада қолиб кетаётганлар бошқа жамоалардан қўним топяпти.

Аммо ҳамма ҳам таркибни кучайтиряпти, дейиш қийин. Мисол учун “Турон” клуби.

Яйпанликлар 2022 йилги мавсумни Про лигада ўтказиб, Суперлигага йўл олди. Табиийки, жамоа кучлилар сафига маҳоратли футболчилар билан кириб бориши керак. Бу ўринда “Турон” таркибида катта ўзгаришлар бўлмоқда. Шартномаси якунланган футболчилар кетди. Ижарадагилар ортқа қайтди. Бошқа клублардан ўйинчилар таркибга қўшилди. Бироқ булар билан “Турон” кучайишига ишониш жуда қийин.

Нега? Чунки таркибга қўшилган аксарият футболчиларнинг жамоаси Про лигага йўл олган. Агар улар кучли футболчи бўлганида “Қўқон-1912” ва “Локомотив” Суперлигани тарк этмаган бўларди. Шунчаки Бахтиёр Ашурматов ўзи билан бирга ишлаган, билган футболчиларни “Турон”га жалб қилмоқда. Лекин бу ечим эмаслигини ҳамма яхши билади. Ўзбек футболидаги мана шундай оғриқли нуқта сабаб футболчи ва мураббийларнинг биргаликдаги кўчиб ўтиши кўпаяди.

Тўғри, кетганларнинг айримлари шартномаси якунланган, ижара муддати тугагандир. Бироқ уларни олиб қолиш истаги бўлганда, янги битим таклиф қилиш мумкин эди. Ҳар ҳолда улар жамоани юқори лигага чиқишига сабабчилардан.

2021 йилги мавсум “Динамо” Про лигадан Суперлигага чиққач, таркиб тубдан ўзгарди. Хатто мураббий ҳам алмашди. Натижа нима бўлганини кўрдик. Буни қарангки, Ҳаким Фузайлов “Бухоро”ни қабул қилиб, жамоани Суперлигага олиб чиқди. Ушбу мутахассис кетма-кет икки йил икки жамоа билан шу вазифани уддалади. Самарқандликларнинг ишидан тўғри хулоса қилган бухороликлар раҳбарияти Фузайловни жамоада қолишини билдирди. Тўғрида, меҳнатни қилган мураббий ва футболчилар юқори дивизионда ўйнашга ҳақли.

Агар “Турон” шу трансферлар билан ҳам лигада зўрға жон сақлаб қолса, бу жамоанинг мағлубияти демакдир. Бу вазифани ўтган йилги йигитлар билан ҳам уддаласа бўлади.

Тақдирни қаранг: “Қўқон-1912” Про лигага тушиб кетди. Қўқонликларни анча вақт бошқарган Бахтиёр Ашурматов Суперлигага яқинлашиб қолган “Турон”га ўтиб, яна юқори лигада ишлайдиган бўлди. Муҳим паллада керакли жойда бўлиш ҳам бир маҳорат.

Бекзод ИСАЕВ