Тухел Англиянинг ЖЧда Аргентинадан учралган мағлубиятидан сўнг фикр билдирди

Англия терма жамоаси бош мураббийи Томас Тухел ЖЧ-2026 ярим финалида Аргентинага қарши кечган ўйинда (1:2) қайд этилган мағлубият юзасидан фикр билдирди.

«Албатта, жуда ранжимиз. Ғалабага жуда яқин келдик, аммо гол урганимиздан сўнг орқага чекиниб, жуда пассив ўйнай бошладик ва дарвозамиз олдида рақибга жуда кўп имконият бериб қўйдик.

Биз ғалабага яқин эдик, лекин ҳисобда олдинга чиққач, устунликни сақлаб қололмадик.

Аргентина футболчилари деярли ҳар бир юқори узатмада биздан олдин тўпга етиб боришди, қанотдан узатмаларни кўпайтиришди. Шунинг учун ҳимоядаги бўшлиқларни ёпиш ва ҳаводаги курашда мустаҳкамроқ бўлиш учун беш нафар ҳимоячи билан ўйнаш тизимига ўтдик.

Албатта, жавобгарлик мураббий зиммасида. Нимадир иш бермаган бўлса, «мураббий хатога йўл қўйди» дейиш осон. Биз иккинчи голни уришни хоҳлаганмиз, лекин ҳужум чизиғидаги алмашинувлар бизга фойда беради, деган ҳиссиёт менда йўқ эди. Шу боис 4-4-2 схемасида қолдик, аммо ўйин борган сари янада пассив бўлиб бордик», — дея Тухел сўзларини ВВС келтиради.

Эслатиб ўтамиз, 2026 йилги футбол бўйича жаҳон чемпионати 11 июндан 19 июлга қадар АҚШ, Канада ва Мексика ҳудудида ўтказилмоқда. Амалдаги жаҳон чемпиони — Аргентина терма жамоаси. 2022 йилги жаҳон чемпионати финалида Аргентина Францияга қарши майдонга тушган эди. Беллашувнинг асосий вақти 3:3 ҳисобида якунланган, пенальтилар сериясида эса аргентиналиклар 4:2 ҳисобида зафар қучган.