Уч суперклуб 18 ёшли ҳужумчини талашиб қолди

Африка кубогининг амалдаги ғолиби Сенегал терма жамоасининг 18 ёшли ҳужумчиси Иброҳим Мбайе Европанинг қудратли клублари ўртасида талаш бўлмоқда.

Бу футболчи яқинда якунланган Африка Миллатлари кубогидаги муваффақиятли ўйинидан кейин хориж клублари назарига тушди.

Журналист Флориан Плеттенберг маълумотига кўра, “Челси” ва “Астон Вилла” 18 ёшли истеъдод учун курашга киришган. Иброҳим Мбайенинг трансфер ҳуқуқига эгалик қилувчи “Пари Сен-Жермен” ҳужумчини ўз таркибида олиб қолмоқчи ва уни Англия клубларидан ҳимоя қилмоқчи.

Футболчининг парижликлар билан шартномаси 2028 йилнинг ёзигача амал қилади ва клуб уни жамоада сақлаб қолиш учун янги битим таклиф қилиш имкониятини кўриб чиқмоқда.

Жорий мавсумда Мбайе ПСЖ сафида барча мусобақаларда 21 та ўйинда қатнашиб, битта гол ва иккита голли узатмани амалга оширган.

Халқаро майдонда ҳам у ўз салоҳиятини намоён қилди. Сенегал терма жамоаси сафида Африка Миллатлари кубогида асосан захирадан майдонга тушиб, олтита ўйинда иштирок этди,  битта гол урди ва иккита ассист қилди.