UFC жангчиси бир йил муддатга мусобақалардан четлатилди

UFC жангчиси Марина Мороз (11-6 | 6-6 UFC) допинг-тести мусбат чиққанлиги сабабли, яъни унинг қонида мелдоний моддаси топилгани учун бир йил муддатга мусобақалардан четлатилди.

CCAD хабарларига кўра, Мороздан 2025 йил 25 июнда Флоридада олинган допинг-намунаси мелдоний мавжудлигини кўрсатган. 2025 йил 16 июлда олинган такрорий тест ҳам мусбат чиққан, аммо биринчи натижа ҳақида спортчига маълумот берилмагани учун бу битта қоидабузарлик сифатида баҳоланган. Мороз препарат шифокор томонидан тайинланганини тасдиқловчи тиббий ҳужжатларни тақдим этган. Бироқ, у шифокорга синовдан ўтаётган спортчи мақоми ҳақида хабар бермаган, модданинг тақиқланганлигини текширмаган ва терапиявий мақсадларда фойдаланиш учун рухсат сўраб мурожаат қилмаган. 

Спортчининг ҳамкорлик қилганини ва препаратни чекланган муддатда қабул қилганини инобатга олиб, CCAD стандарт икки йиллик дисквалификация муддатини бир йилга қисқартирди. Натижада, Мороз 2026-йил 17-июлдан бошлаб яна жангларга қайтиши мумкин бўлади.

Украиналик спортчи Марина Мороз ўзининг сўнгги жангини 2024 йил 9 март куни "UFC 299" турнирида Жоанн Калдервудга қарши ўтказиб, мағлуб бўлган эди.