UFC ни машҳур брендга айлантирган тўртта жангчи ким?

UFC бош директори Дана Уайт промоушеннинг жаҳон миқёсида машҳур брендга айланишида ҳал қилувчи роль ўйнаган тўрт нафар жангчини санаб ўтди.

"Бу рўйхатга Конор Макгрегор, Хабиб Нурмагомедов, Чак Лидделл ва Ронда Роузини киритиш мумкин.

Тўғри, ҳозир кўпчилик Ронда ҳақида ёмон гапиради, лекин Роузи ёнимга келгунга қадар мен UFC да аёллар жангини умуман кўришни истамасдим. Бироқ у бир тадбирда ёнимга келиб: “Салом, мен Ронда Роузиман. Менга 15 дақиқа вақт ажрата оласанми?” деди. Биз аренадаги хонамга кирдик, бир неча дақиқалик суҳбатдан сўнг ўзимга: “Жин урсин, бу ишни чиндан ҳам қилишим керак шекилли”, деб ўйладим.

У бошиданоқ ўзига ишонч ва жасорат билан кириб келди. Агар кимнидир “ўзини исботлаш учун майдонга чиққан инсон” деб аташ мумкин бўлса, бу, албатта, Ронда эди. Ҳозир жуда кўп одамлар уни ёқтирмайди. Аммо у барибир ўзига хос, бетакрор шахс", — дея таъкидлади Дана Уайт "The Diary Of A CEO" подкастида.