Уимблдон. Чорак финалнинг 4 баҳсидан 3 таси 5 сет давом этди

Теннис бўйича "Катта дубулға" туркумига кирувчи "Уимблдон" мусобақасининг эркаклар ўртасидаги баҳсларида ярим финалчилар номи маълум бўлди.

Турнирнинг 1-рақамли ракетка устаси Новак Жокович италиялик Янник Синнер қаршилигини синдиришда катта қийинчликка дуч келди. Дастлабки икки сетни бой берган сербиялик ирода кўрсатиб, якунда драматик ғалабани қўлга киритди. Ҳисоб - 5:7, 2:6, 6:3, 6:2, 6:2.

Мезбонлар шарафини ҳимоя қилаётган Кэмерон Норри учун ҳам ярим финал чиптасини қўлга киритиш осон кечмади. У бельгиялик Давид Гоффен устидан 5 сетда ғалаба қозонди, 3:6, 7:5, 2:6, 6:3, 7:5.

Чемпионлик учун асосий даъвогарлар икки спортчидан бири Рафаэль Надаль ҳам чорак финалда анчагина тер тўкди. Испаниялик теннисчи АҚШ вакили Тейлор Фритц билан кечган ўта оғир баҳсни ўз фойдасига ҳал этишга муваффақ бўлди. Якуний ҳисоб - 3:6, 7:5, 3:6, 7:5, 7:6(10:4).

Чорак финалдаги энг осон ғалаба "сариқ қитъа"дан ташриф буюрган Ник Кирьос томонидан қўлга киритилди. Унга Чили шарафини ҳимоя қилган Кристиан Гаринни мағлуб этиш учун 3 сету, 135 дақиқа кифоя қилди, 6:4, 6:3, 7:6(7:5).

Энди ярим финалда қуйидаги қарама-қаршиликлар гувоҳига айланамиз:

Ник Кирьос - Рафаэль Надаль

Новак Жокович - Кэмерон Норрис.

Ҳар икки беллашув 8 июль куни 17:30 да старт олади.