Улар Файзуллаевни танлашди...

30 сентябрь, 18:06
0
Футбол

Россия Премьер-лигасининг 10-тур учрашувлари якунланди. Ушбу чемпионатда иштирок этаётган беш нафар легионеримиздан фақатгина Аббосбек Файзуллаев майдонга тушди.

“Рубин” Умарали Раҳмоналиев ва Рустам Ашурматов, “Акрон” Шерзод Эсонов ҳамда “Химки” Алишер Одилов хизматидан фойдалангани йўқ. Уларнинг ҳаммасини ўрнига Аббосбек Файзуллаев зўр ўйнаб берди.

ЦСКА бу турда “Ахмат” футболчилари билан куч синашиб, 3:0 ҳисобида зафар қучди. Йирик ҳисоблаги ғалабага 19-дақиқада биринчи голни урган легионеримиз пойдевор қўйди. Учинчи гол ҳам бевосита Аббоснинг иштирокида бўлди. Дарвоза олдида тўп учун Файзуллаев билан курашган Дарко Тодорович ўз дарвозасини ишғол қилиб қўйди.

Россия футболини ёритаётган нуфузли манбалар тур якунларига кўра, энг яхши ўйинчилардан рамзий терма жамоаларни тузиб чиқмоқда.

Sports.uz портали ўзбекистонлик футбол ишқибозлари эътиборига иккита оммавий ахборот воситаси танлови ва экспертлари хулосасини ҳавола этади.

CHAMPIONAT.COM:

Дарвозабон: Александр Беленов (“Факел”).

Ҳимоячилар: Келлвен (ЦСКА), Диего Коста (“Краснодар”), Сесар Монтес (“Локомотив”), Данил Круговой (ЦСКА).

Ярим ҳимоячилар: Илья Самошников (“Локомотив”), Валерий Царукян (“Нижний Новгород”), Алексей Батраков (“Локомотив”), Аббосбек Файзуллаев (ЦСКА).

Ҳужумчилар: Артём Дзюба (“Акрон”), Жон Кордоба (“Краснодар”).

CHAMPIONAT.COM изоҳи:

Ўзбек легионери ЦСКАнинг йирик ҳисобдаги ғалабаси қаҳрамонларидан бири. Файзуллаев зўр зарба билан “армиячилар”нинг биринчи голини урди, учинчи тўп киритилишида ҳам ҳиссаси катта. Аббосбек ўйин давомида дарвозага уч марта зарба берди, жамоадошларининг учта якуний зарбасига пас узатди, тўрт маротаба жарима зарбаси ишлаб берди.

FOOTBALL.KULICHKI.NET:

Дарвозабон: Станислав Агкацев (“Краснодар”)

Ҳимоячилар: Келлвен (ЦСКА), Сесар Монтес (“Локомотив”), Мойзес (ЦСКА), Роберто Фернандес (“Динамо”)

Ярим ҳимоячилар: Илья Самошников (“Локомотив”), Артём Карпукас (“Локомотив”), Стефан Лончар (“Акрон”), Аббос Файзуллаев (ЦСКА)

Ҳужумчилар: Артём Дзюба (“Акрон”), Жон Кордоба (“Краснодар”).

FOOTBALL.KULICHKI.NET изоҳи:

Рамзий терма жамоа чап қанот ярим ҳимоячисини танлашда озгина айёрлик бўлди. Чунки Аббос “Ахмат”га қарши учрашувни деярли ўнг қанот ҳужумчиси сифатида ўтказди.

Лекин ўзбек легионери ўйинни чап қанотда бошлагани ҳисоб. Файзуллаев зўр ўйин ўтказди. Айнан унинг ўзи биринчи бўлим ўрталарида аниқ зарбаси билан йирик ҳисобга асос яратиб берди.

Иккинчи бўлимда Файзуллаев дублга яқин эди. Бироқ рақиб ҳимоячиси тўпни ундан олдин ўз дарвозасига жойлаб қўйди.

Эслатиб ўтамиз, Аббосбек Файзуллаев ЦСКА ва “Ахмат” жамоалари ўртасидаги учрашувнинг энг яхши ўйинчиси, деб топилди ва махсус соврин билан тақдирланди.