Ummon bosh murabbiyi: "Ilk o‘yinda O‘zbekistonga qarshi qanday o‘ynashimizni maydonda ko‘rib olasiz"

Ertaga "CAFA Nation's Cup" musobaqasiga start beriladi. 7 ta terma jamoa ishtirok etadigan turnir oldidan Ummon terma jamoasi bosh murabbiyi Branko Ivankovich matbuot anjumanida ishtirok etdi. 

"Hammaga hayrli kun! Avvalambor, O‘zbekiston Futbol Assotsiatsiyasiga qatnashish taklifini bergani uchun minnatdorchilik bildiramiz. Biz bu musobaqada ishtirok etayotganimizdan mamnunmiz. O‘zbekistonga birinchi marta kelayotganim yo‘q. Oldin ham ikki marta bu yurtga tashrif buyurganman. Maqsadimiz - turnirda yuqori natijalar qayd etish. 

O‘zbek jamoalarini hurmat qilaman. Ularga qarshi o‘ynash bizga doim qiyinchilik tug‘dirib kelgan. O‘ylashimcha, o‘zbek jamoalarida avvalgiga qaraganda juda keskin o‘zgarishlar bo‘lmagan. 

O‘zbekiston, Eron kabi termalar eng yaxshi tarkib bilan bu musobaqada ishtirok etishmoqda. Kuchli raqiblarga, turli usullarga ega jamoalarga qarshi o‘ynash biz uchun yaxshi tajriba bo‘ladi. Ushbu holat turnirning darajasi yuqori ekanidan dalolat beradi. 

Ilk o‘yinda O‘zbekistonga qarshi qanday o‘ynashimizni maydonda ko‘rib olasiz. Biz mezbonlarni hurmat qilamiz. Ular kuchli jamoa ekanini butun mintaqa yaxshi biladi. 

Raqib murabbiylari bilan yaxshi tanishmiz. Turkmaniston va Tojikiston ham yaxshi qarshilik ko‘rsatadi. Ular bilan shunchaki o‘rtoqlik o‘yini o‘tkazib ketmoqchi emasmiz!, - dedi mutaxassis.