“Вест Хэм” мураббийи “Сити”дан учралган мағлубият сабабини очиқлади

Англия Премьер-лигасининг 17-турида “Манчестер Сити” ўз майдонида “Вест Хэм”ни 3:0 ҳисобида мағлубиятга учратиб, 37 очко билан мусобақа жадвалида вақтинча бўлса-да, биринчи ўринга кўтарилиб олди.

Учрашувдан кейин “Вест Хэм” бош мураббийи Нуну Эшпириту Санту ўз фикр-мулоҳазаларини билдириб ўтди.

- Биз иккинчи бўлимни, айниқса унинг бошланишини, яхшироқ ўтказдик. Ўйиннинг биринчи ярми биз учун  унчалик яхши бўлмади. Биз ўйинни жуда ёмон бошладик. Рақиб тезкор гол урди ва ўйинни назорат қилди.

Иккинчи тайм яхшироқ чиқди. Биз режалаштирган ишларимизни тўлиқ бажара олмадик.

Шундай тез гол ўтказиб юборганда барчаси янада қийинлашади. Биз бу ўйинни диққат билан таҳлил қилишимиз керак, - деди Нуну Эшпириту Санту.

 “Вест Хэм” айни пайтда Англия чемпионати турнир жадвалида 18-ўринни эгаллаб турибди. Жамоа Премьер-лигада ўтказилган 17 та ўйинда 13 очко жамғарган.