"Викинг" ўйинчиси Европанинг учта клуби нишонига тушди

Норвегиялик ҳимоячи Йеспер Даланн, ҳозирда ижара асосида «Викинг» клуби шарафини ҳимоя қилаётган бўлса-да, Европанинг қатор жамоалари эътиборини ўзига қаратган. Бу ҳақда ижтимоий тармоқлар орқали инсайдер Экрем Конур хабар берди.

Журналист маълумотларига кўра, 26 ёшли скандинав футболчига Германиянинг «Айнтрахт», «Шальке» ҳамда Франциянинг «Лилль» клублари қизиқиш билдирмоқда.

Қайд этиш жоизки, Даланнинг тўлиқ трансфер ҳуқуқи Англия чемпионатида иштирок этувчи «Кардифф Сити» клубига тегишли. 

Унинг «Викинг» билан ижара шартномаси 2027 йил январ ойи охиригача амал қилади. Transfermarkt портали мутахассисларининг баҳолашича, футболчининг бозор қиймати тахминан бир ярим миллион еврони ташкил этади.

Жорий мавсум Норвегия чемпионати доирасида Йеспер Даланн икки учрашувда майдонга тушди ва бир бор сариқ карточка олди.