Виктор Кумиков: "Марказий Осиёнинг 3 та мамлакатидан яхши таклифлар бор. Фақат танлаш қолди, холос"

Яқинда хабар берганимиздек, ўзбек мухлисларига яхши таниш бўлган россиялик Виктор Кумиков “Қайсар” клуби бош мураббийлигидан кетди.

Сўнгги уч мавсумни айнан Қозоғистон чемпионатида ўтказди.

Ҳозирда уйда хордиқ чиқараётган мутахассис Sports.uz журналистининг бир қатор саволларига жавоб берди.

- Виктор Балютович, “Қайсар” клубидаги фаолиятингиз якунланганини эшитдик. У ердан кетишингиз сабаби нима билан боғлиқ?

- Клубни янги эгалари келди. Уларни жамоани кучайтириш бўйича ўзларини қарашлари бор эди. Мен шартномада белгиланган вазифаларни бажардим. Янги шартномаси эса менга таклиф қилишмади.

- Айтинг-чи, Қозоғистондаги фаолиятингиз ўзингиз кутгандек кечдими?

- Биз мавсум учун қўйилган вазифани бажардик. Албатта, биздан янада кўпроқ нарсани кутишганди. Лекин вазият йилдан-йилга ёмонлашиб борди.

- Кейинги режаларингиз қандай? Ўзбекистонга қайтишингиз мумкинми?

- Учта мамлакатдан таклифлар бор. Бир-икки ҳафта ичида аниқ қарорга келамиз.

- Сир бўлмаса олдингизда қандай таклифлар бор?

- Айтганимдек, Марказий Осиёнинг учта давлатидан таклиф бор. Барчаси яхши таклифлар, фақатгина танлаш қолди, холос.

- Кўпчилик қозоғистонлик иқтидор эгаси Сатпаевни Абдуқодир Хусанов билан солиштиришмоқда. Сизнингча, ким кучли?

- Бу икки футболчини солиштириш тўғри бўлмайди. Биринчидан, улар бошқа-бошқа позицияларда ўйнашади. Иккинчидан, Хусанов анча тажрибали футболчи. Бир неча йилдан бери хорижда ўйнайди. Сатпаев бўлса ҳали катта умид уйғотаётган футболчи ҳисобланади. Фақатгина у Қозоғистонда ўйнаган ўйинчи. Иккаласига ҳам омад тилайман.