Винисиус Неймарни қувяпти

Европа Чемпионлар лигаси умумий босқичининг 7-туридан ўрин олган учрашувда “Реал” фуболчилари Франциянинг “Монако” жамоаси билан куч синашиб, рақибни 6:1 ҳисобида таслим қилди.

Мадридликларнинг голларидан бирини Винисиус Жуниор урди.

Бу 25 ёшли футболчининг қитъанинг энг нуфузли мусобақасидаги 30-голи сифатида қайд этилди. Шу тариқа, Винисиус Европа Чемпионлар лигасида энг кўп тўп киритган бразилиялик ўйинчилар рейтингида иккинчи ўринга кўтарилди.

Янада аниқроқ айтадиган бўлса, Винисиус илгари “Милан” сафида ўйнаб, Чемпионлар лигасида 30 та тўп киритган ҳамюрти Какага етиб олди.

Биринчи ўринда эса, “Барселона” ва ПСЖ сафида Чемпионлар лигасида жами 43 та гол муаллифи бўлган Неймар турибди.

Винисиус Жуниорнинг ҳар икки рақобатчиси ҳам Европа Чемпионлар лигасидаги кўрсаткичларини ўзгартириш имконига эга эмас. Демак, “Реал” ҳужумчиси бразилиялик тўпурарлар рекордини янгилаши мумкин.