Винисиус "Реал"га "Ливерпуль" футболчисини олиб келишни хоҳламоқда

"Реал" ҳужумчиси Винисиус Жуниор клуб раҳбариятини Англия чемпионатида тўп сураётган топ ярим ҳимоячилардан бирини жамоага олиб келишга ундамоқда.

Маълумотларга кўра, бразилиялик футболчи "Ливерпуль" ярим ҳимоячиси Доминик Собослаининг "қаймоқранглилар" сафини тўлдиришини истамоқда. "Transfer News Live" нашри "Defensa Central" манбасига таяниб хабар беришича, Винисиус Собослаини "Реал" учун идеал футболчи деб ҳисоблайди.

Аввалроқ оммавий ахборот воситаларида венгриялик футболчи ҳам келажакда "Реал"да ўйнашни орзу қилиши ҳақида хабарлар тарқалган эди. Шунингдек, Винисиус Собослаи билан яхши муносабатда эканини ҳам айтган.

Қайд этилишича, 25 ёшли Доминик Собослаининг трансфер қиймати Transfermarkt порталига кўра 85 миллион еврони ташкил қилади.