Ханс-Дитер Флик: "Биринчи бўлимда жамоа руҳсиз кўринди"

"Барселона" бош мураббийи Ханс-Дитер Флик Испания кубоги ярим финалида "Атлетико"дан 0:4 ҳисобидаги мағлубиятдан сўнг футболчиларни кескин танқид қилди.

"Mundo Deportivo" нашрининг хабарига кўра, бугунги машғулот олдидан бўлиб ўтган суҳбатда немис мутахассиси жамоа биринчи бўлимда "руҳсиз, шиддатсиз ва курашиш истагисиз" кўринганини таъкидлаган. Унинг фикрича, "Атлетико" эса аксинча, ҳар бир тўп учун тўлиқ курашган.

Мураббий биринчи бўлимдаги ўйин титуллар учун курашаётган ва финалга яқинлашган жамоага мутлақо муносиб эмаслигини айтган. Флик футболчилар рақибнинг ҳар бир эпизодда бор кучини ишга солишини била туриб, қандай қилиб етарли руҳий тайёргарликсиз майдонга тушганини тушунмаслигини ҳам билдирган.

Шундан сўнг у жамоани Ла Лига доирасидаги "Жирона"га қарши учрашувга эътибор қаратишга чақирган ва "Атлетико"дан учралган мағлубиятни сабоқ сифатида қабул қилишни тавсия этган.

"Барселона" ва "Атлетико" ўртасидаги жавоб учрашуви 3 март куни бўлиб ўтади.