Хаусенга қизил карточка кўрсатилмаслиги керак эди

Ҳакамлар ва ВАР қарорларини таҳлил қилувчи нуфузли Achivo VAR Х ижтимоий тармоғида кечаги "Реал Сосьедад"-"Реал Мадрид" учрашувидаги қизил карточка берилган вазиятни ўрганди.

Ўйиннинг 32-дақиқасида "қироллик клуби" ҳимоячиси Дин Хаусенга тўғридан-тўғри қизил карточка кўрсатилди. Испаниялик футболчи майдон марказида қарши ҳужумга ўтиб кетаётган Микель Оярсабални тўхтатиб қолди.

Archivo VAR мутахассислари, Хаусенга қизил карточка кўрсатилиши хато деган тўхтамга келишди. Уларнинг таъкидлашича, 20 ёшли испан сўнги ҳимоячи эмасди, у Микелни ушлаб қолиб зарарсизлантирди. Аммо бу қизил учун асос эмас.

"Бундан ташқари, ҳужумчи дарвоза томон бурчак остида эди, шунинг учун аниқ гол уриш имконияти ҳақида гапирмаса ҳам бўлади",- дейилади постда.