Хоккей тамом! ВХЛда ҳам мавсум муддатидан олдин якунланади

Россия хоккей федерацияси Олий хоккей лигасида (ВХЛ) коронавирус пандемияси боис мавсум муддатидан олдин якунланганлигини эълон қилди.

"Бугун Қитъавий хоккей лигасида (КХЛ) 2019/20 йилги мавсумни муддатидан олдин якунлангани ҳақидаги қарор қабул қилинди. Бу қарор хоккейчилар, клуб ходимлари ва мухлисларнинг саломатлигини ўйлаган ҳолатда Россия Спорт вазирлиги томонидан "21 мартдан бошлаб мамлакатда барча спорт тадбирлари ўтказилишини бекор қилиш ёки кўчириш тўғриси"даги фармонига асосланиб қабул қилинди.

Россия хоккей федерацияси (РХФ) КХЛнинг қарорини қўллаб-қувватлайди. Бизнинг асосий бойлигимиз - инсонлар саломатлиги ва уларни ҳимоя қилиш учун барча чора-тадбирларни қабул қилишимиз керак.

РХФ Бутунроссия мусобақаси - "ВХЛ - Буюк ипак йўли кубоги"ни ўтказиб келувчи ВХЛга ҳам  мавсумни муддатидан олдин якунлашни таклиф қилади.

2019/20 йилги мавсумда клублар эгаллаган ўринларни ўрнатилган тартибда аниқлаш яқин  фурсат ичида ВХЛ томонидан қабул қилинади", - дейилади Россия хоккей федерациясининг расмий баёнотида.

Маълумот учун, ВХЛда Тошкентнинг "Ҳумо" жамоаси ҳам иштирок этади ва Евгений Попихин шогирдлари мусобақанинг плей-офф босқичи чорак финалида Москванинг "Звезда" клубига қарши бешинчи ўйинини ўтказиши лозим эди. Серия 3:1 кўринишини олган вақтда лига аввалига 24 март, сўнг 10 апрелга қадар хоккей учрашувлари тўхтатиб қўйилганлигини эълон қилган эди.

Матнда хатолик топсангиз, ўша хатони белгилаб, бизга жўнатинг (Ctrl + Enter)