Холанд "Реал"га Винисиус ва Мбаппе туфайли ўтмайди

"Манчестер Сити" жамоаси ҳужумчиси Эрлинг Холанд Мадриднинг "Реал" клубига ўтиш ниятида эмас. Бу ҳақда ElNacional нашри хабар берди.

Манба маълумотларига кўра, норвегиялик форвард келажакда клубини ўзгартириш вариантларини кўриб чиқиши мумкин. Аммо бу қарор "Манчестер Сити" бош мураббийи Хосеп Гвардиола жамоани тарк этгани сабаб амалга ошиши эҳтимол қилинмоқда.

Шу билан бирга, Холанд ҳозирча "Реал" сафига қўшилишни режалаштираётгани йўқ. Сабаби сифатида Килиан Мбаппе ва Винисиус Жуниорнинг мадридликлар таркибида экани кўрсатилмоқда. Нашр ёзишича, норвегиялик футболчи бу икки юлдуз билан бир жамоада, бир кийиниш хонасида бўлишни истамайди.

ОАВдаги маълумотларга кўра, Холанднинг "Манчестер Сити" билан тузган шартномасида 175 миллион евро миқдорида тўлов эвазига келишувни бир томонлама бекор қилиш имконини берувчи банд мавжуд.

Эслатиб ўтамиз, 2025/26 йилги мавсумда Эрлинг Холанд барча мусобақалар доирасида 52 та ўйинда майдонга тушиб, 38 та гол урди ва 9 та голли узатма амалга оширди.