Холанд Роналдуни пастга суриб юборди

Англия Премьер-лигасининг 17-турида “Манчестер Сити” ўз майдонила “Вест Хэм Юнайтед” жамоасини қабул қилиб, рақиб устидан йирик 3:0 ҳисобида ғалаба қозонди.

“Шаҳарликлар” сафида Эрлинг Холанд дубль қайд этган бўлса, Тижани Рейндерс битта тўп киритди.

Норвегиялик ҳужумчининг икки голи уни Англия Премьер-лигаси тўпурарлари рўйхатида яна бир поғона юқори кўтарди. 25 ёшли форварднинг АПЛда урган умумий голлари сони 104 тага етди.

Холанд бу кўрсаткич бўйича Криштиану Роналдуни ортда қолдириб, Дидье Дрогба билан тенглашиб олди. Англия чемпионатида икки марта ўйнаган Роналдунинг “Манчестер Юнайтед”даги умумий голлари сони 103 тада тўхтаган эди.

Эрлинг бу натижага эришиш учун рақобатчиларидан анча кам вақт сарфлаган. Холанд 2022 йилнинг ёзида “Манчестер Сити”га келганидан буён миллий чемпионатда 140 та учрашувда 104 та тўп киритишга муваффақ бўлди.

Жорий мавсумда Эрлинг Холанд Англия чемпионатида 17 та ўйин ўтказиб, 19 та гол урди ва 3 та натижали узатмани амалга оширган ҳолда тўпурарлар баҳсида етакчилик қилмоқда.