Холанддан зўр тўпурар бор

Норвегия терма жамоаси ва “Манчестер Сити” ҳужумчиси Эрлинг Холанд бир неча мавсумдан бери тинимсиз гол урмоқда. Ҳатто икки йил муқаддам Англия Премьер-лигасидек мураккаб турнирга келганидан бери ҳам голлари ва ассистларининг умумий сони ўйинлари сонидан кўп.

Шунга қарамай, “Тоттенхэм”нинг собиқ футболчиси Рафаэль ван дер Варт “Спортинг” форварди Виктор Дьёкерешни Эрлинг Холанддан устун эканини таъкидламоқда.

- Гапим аҳмоқона туюлиши мумкин, лекин Дьёкереш Холанддан анча кучли. Табиийки, Холанд зўр футболчи, лекин Дьёкерешда унда йўқ нимадир бор, - деди Рафаэль ван дер Варт.

Жорий мавсум статистикаси ҳам швед футболчининг устунлигини кўрсатмоқда. Холанд барча турнирларда 15 та учрашув ўз ҳисобига 14 та гол ёздириб қўйди. Дьёкереш эса, 17 та ўйинда рақиблар дарвозасини 23 маротаба ишғол қилди ва тўртта ассистни амалга оширди.