Хусайн Норчаев: "Нефтчи" сафида "Насаф"га қарши ўйнаганимда унчалик яхши хиссиётлар ўтмади"

Мамлакатнинг амалдаги чемпион - “Насаф” янги мавсумда энди ўша чемпионлик камарини муносиб ҳимоя қилиши керак бўлади. Шу боис таркибини янада кучайтириб боряпти ва собиқ ўйинчиларини ҳам қайтаряпти.

Улардан бири ҳужумчи Хусайн Норчаев бўлиб, футболчи яна “Аждарлар” сафига қайтди.

Биласиз, аслида “Алания”га тегишли бўлган ҳужумчи ўтган йили “Нефтчи”да ижарада ўйнаганди. 2025 йилда эса у яна “Насаф”га қайтди. Норчаев куни кеча клуб матбуот хизматига интервью берди.

- “Насаф”га келганимдан жуда хурсандман. Шу ерда катта бўлиб, илк профессионал ўйинларимни шу ерда бошладим. “Насаф” жамоасидан кўп нарсани ўрганганман. Шу сабабли бу ерга қайтганимдан жуда мамнунман. Ҳамма яхши кутиб олди. Бу йил олдимизда яхши мақсадларимиз бор. Худо хоҳласа, ҳаммасига жиддий тайёргарлик кўрамиз.

- “Насаф”да ўйнаб кетган пайтингиз билан ҳозирги жамоа ўртасида қандай ўзгаришлар бор?

- Катта фарқи йўқ. Чунки “Насаф” катта жамоа ва ҳар йили олдига катта мақсадлар қўйиб келади.

- Ушбу мавсумда жамоанинг ҳужум чизиғини қандай баҳолайсиз? Черан, Хебай, Нуруллоев каби ўйинчилар қўшилишган...

- Жуда яхши баҳолайман. Чунки яхши савиядаги футболчилар келишди. Анча тажрибали ва голларни ҳис қиладиган ҳужумчилар жам бўлишди.

- Ўтган мавсумда “Нефтчи” таркибида тўп сурдингиз. “Насаф”га қарши ўйнаганингизда кўнглингиздан қандай хиссиётлар ўтди?

- Албатта, унчалик яхши хиссиётлар ўтмади. Чунки ўзим катта бўлган жамоага қарши ўйнадим. Бироқ биз профессионалмиз. Ўзимизни ишимизни қилишимиз керак.

- Келажакда жамоавий ва шахсий қандай мақсадларни қўйдингиз?

- Худо хоҳласа, бу йил “Насаф” билан яна чемпионликни сақлаб қолиш ҳамда Элит Осиё Чемпионлар лигасида яхши натижа кўрсатиш мақсадини қўйганмиз. Ўз олдимга қўйган мақсадим эса “Насаф”га яхши фойдам тегишидир. Мухлисларга мурожаатим, бизни бу йил яхши қўллаб-қувватланглар. Насиб қилса, биз сиз кутган ўйинни кўрсатишга ҳаракат қиламиз.