Яна бир юлдуз Саудиядан Европага қайтяпти
Унга жиддий таклиф бор
Франциялик ярим ҳимоячи Мусса Диаби ёзда Саудия Арабистонининг «Ал-Иттиҳод» клубини тарк этиши мумкин. 27 ёшли футболчининг келажаги борасида вазият кутилмаганда ўзгарди: Goal нашри хабарига кўра, «Байер» унинг трансфери юзасидан саудияликлар билан музокараларни қайта тиклаган.
Маълумотларга қараганда, Германия клуби ёзги трансфер ойнаси бошидаёқ Диабига қизиқиш билдирган, аммо орадан кўп ўтмай томонлар ўртасидаги мулоқот тўхтаб қолган эди. Энди эса «Байер» яна бир бор келишувга эришишга уринмоқда. Манбага кўра, «Ал-Иттиҳод» франциялик футболчига ўринбосар топиш бўйича иш бошлаб юборган.
Диаби 2024 йил ёзида «Астон Вилла» таркибидан «Ал-Иттиҳод»га ўтган. Саудиядаги илк мавсумиёқ у жамоага мамлакат чемпионлиги ва Қирол кубогини қўлга киритишда муҳим ҳисса қўшган. Аммо кейинчалик унинг самарадорлиги ва ўйинга таъсири сезиларли даражада пасайди, шу боис футболчининг кетиши мумкинлиги ҳақида миш-мишлар пайдо бўлди.
Мусса Диаби 2019–2023 йилларда «Байер» шарафини ҳимоя қилган. Леверкузен клубини тарк этгач, у «Астон Вилла»га йўл олган, шундан сўнг эса карьерасини Саудия Арабистонида давом эттирган. Ҳозирда футболчининг трансфер баҳоси тахминан 25 миллион евро атрофида баҳоланмоқда.
Изоҳлар (0)