Яхшибоев Беларусь чемпионлигига муносибми?

Бу йилдан эътиборан, ўзбекистонлик футбол мухлислари Беларусь чемпионати олий лигасини катта қизиқиш билан кузатиб бормоқда. Бунга ўзбекистонлик чарм тўп усталари – Жасур Яхшибоев ва Шаҳбоз Умаровнинг ушбу мамлакат футболида ўз ўрнини топа олгани сабаб бўлгани ҳеч кимга сир эмас.

Ҳар икки футболчимиз “Энергетик-БГУ”даги ўйинлари туфайли мамлакатнинг икки гранд клуби – “Шахтёр” ва БАТЭ билан шартнома тузишга муваффақ бўлди. Жасур биринчи даврадан сўнг, янги жамоасига кўчиб ўтиб, етакчи футболчига айланишга улгурган бўлса, Шаҳбоз БАТЭ таркибига мавсум якунлангач, январда кўчиб ўтади.

Ўзбек футболчиларининг ўйинидан мамнун бўлган “Энергетик-БГУ” раҳбарияти “Пахтакор”дан яна бир истеъдод эгаси Ҳумоюнмирзо Иминовни ижарага олди. Иминов ҳам ёш бўлишига қарамай, янги жамоасининг асосий ўйинчиларидан бирига айланиб бормоқда.

Беларусдаги уч футболчимиз  орасида Жасур Яхшибоев чемпионлик унвонини қўлга киритиш имконига эга бўлиб турибди.  Бунинг  учун “Шахтёр” бугун бўладиган 25-турнирнинг қолдирилган учрашувида ғалаба қозониши шарт.  Солигорскликлар сафар учрашувида “Белшина” билан рақобатлашади.

Бобруйск шаҳридаги ўйин солигорскликлар учун ўта муҳим аҳамиятга эга ва Жасур Яхшибоев жамоасини фақатгина ғалаба қониқтиради. Агар “Шахтёр” беллашувни ўз фойдасига ҳал қилса, биринчи ўринда турган БАТЭ билан очколар орасидаги фарқни биттагача қисқартиради. Ва чемпионлик масаласи кейинги учрашув – 28-турдан ўрин олган “Шахтёр“ ва БАТЭнинг ўзаро рақобатида ҳал бўлади.

Чунки сўнгги икки турда ҳар икки жамоа ҳам нисбатан енгил рақиблар билан тўқнаш келади. Хусусан, “Шахтёр”  ўртамиёна клублар – “Рух” ва “Минск” футболчиларига қарши майдонга чиқади. БАТЭ эса айтсайдер “Белшина” ва олтинчи ўриндаги “Динамо-Минск” билан ўйнайди.

Олий лигадаги жойини сақлаб қолиш учун курашаётган “Белшина” бугун жон талвасасида “Шахтёр”дан очко оладиган бўлса, солигорскликларнинг чемпионлик орзуси саробга айланиши мумкин.  

Шуларни ҳисобга олган ҳолда, Жасур Яхшибоев жамоасини бугун ўта мураккаб ва муҳим учрашув кутиб турибди, дейишимизга асос бор. Шунингдек, ўзбекистонлик легионер жамоа етакчиларидан бири сифатида ана шундай муҳим паллада ўзини кўрсатиши керак бўлади. Жасур Яхшибоев олий лигада 12 сентябрдан бери гол уролмаяпти. Узоқ муддат тўпурарлар баҳсда яккапешқадамлик қилган ҳамюртимиз ўз мавқеини ашаддий рақиб – БАТЭ ҳужумчиси Максим Скавишга бой бериб қўйди. Тажрибали ҳужумчи голлари сонини 17 тага етказиб, Жасурдан учта тўп фарқи билан олдинга ўтиб кетди.

Умуман олганда, Жасурнинг легионер сифатидаги фаолият муваффақиятли чиқмоқда. Ўз вақтида, “Пахтакор” бош мураббийи Шота Арвеладзега керак бўлмай қолган футболчимиз Беларусдаги ўйинлари туфайли яна миллий терма жамоа номзодлари қаторига қўшилди. Ўзбекистон миллий терма жамоасини бошқараётган Вадим  Абрамов  Яхшибоевни ўтган ойдаги йиғинга чақирди ва Эрон билан бўлган ўйинда ўзини кўрсатиши учун имконият берди.

Энди Жасурга мухлислик қилаётган ҳамюртларимиз учун эса, Яхшибоевнинг мавсумни Беларусь чемпиони сифатида якунлаши айни муддао бўларди. Чунки Беларусь чемпионига келаси мавсумда Европа Чемпионлар лигасида иштирок этиш ҳуқуқи берилади.

“Белшина” – “Шахтёр” ўйини Тошкент вақти билан 15:00да бошланади.