"Ювентус" ва "Милан" футболчилар алмашинувини амалга оширмоқчи

"Ювентус" "Милан" билан йирик трансфер битимини амалга ошириши мумкин.

"Sportmediaset" маълумотларига кўра, Турин клуби ўтган мавсумда "Милан" сафида 35 та ўйинда иштирок этган 27 ёшли ҳимоячи Фикаё Томорини сотиб олиш ниятида.

Шунингдек, жамоалар ўзаро футболчилар алмашинуви ўтказиши мумкин: Тео Эрнандес "Ювентус"га, Душан Влахович эса "Милан"га ўтади. Таъкидланишича, туринликлар Влахович учун тахминан 30 миллион евро олишни хоҳлайди, миланликлар эса Теонинг трансфер қийматини 25 миллион еврога баҳоламоқда.

Эрнандес ва Влахович билан янги шартномалар бўйича маошларни келишиб олиш энг мураккаб вазифа бўлиши таъкидланмоқда.

Шартномаси 2026 йилда тугайдиган Тео бир мавсум учун 6 миллион евро сўрамоқда - "Ювентус" бундай харажатларга тайёр эмас.

Душан ҳозирда йилига тахминан 12 миллион евро маош олади, бу эса "Милан"ни қониқтирмайди. Унинг амалдаги шартномаси ҳам 2026 йил 30 июнгача амал қилади.